Vawiin khan zirlaite tana khuarel chhiatrupna thlen thulha inven dan tur inzirtirna atan Aizawl District Disaster Management Authority huaihawtin National School Safety Programme hnuaia school 250 chuangte tan Inter-School Competition on “Towards Disaster Resilient Schools” neih a ni.

He inelna hi Aizawla hmun 4 - Govt Chaltlang Hr. Secondary School, Chhinga veng BRC, Govt. Boys Primary School leh Kulikawn Middle School te bakah Darlawn BRC, Saitual BRC leh Aibawk BRC -ah zirlaite tan buatsaih ani. He inelna ah hian Primary Sikul naupang tan kangmei laka invendan inzirtirna lam hawi milem Crayon rawng hmanga incheisiak buatsaih a ni a, Middle Sikul tan ‘Thank You Fire Fighters ‘ tih thupui hmanga milem ziak water colour hmanga an incheisiak a ni a, High Sikul-ah thupui pathum -1) Inkang titlem tura mitin mawhphurhna/ tihtheihte, 2) Leimin titlem turin engtinge hma kan lak ang?, 3) Thlipui avanga tawrhna tinep tura chhungtin lo inpuahchah na tur te tih thupui hmangin Essay inziahsiak neih a ni a, Higher Secondary Sikul te tan - 1) Fire Safety, 2) Landslide safety , 3) Cyclone safety , 4) Earthquake safety tih thupui hmangin poster in siam siakna an nei bawk a ni.

Vawiina inelna hi Sub- Division level a ni a, an bialtu DEO leh SDEO ten a hmunah tukin dar 10 khan hawngin inelna hi an vil zui a, heng inelna a naupang zinga a tihtha zual 20% zel hi District level inelna ah an intihsiak leh dawn a ni. Vawiin zirlai inelna ah hian naupang 503 an tel a ni.