Nimin khan Aizawl District Fire Prevention Committee hmalakna kal zel Awareness Campaign chu Lengpui-ah a kharna neih a ni a, hetah hian NGOs, VC, High School naupang, Sorkar hnathawk te leh mipui 300 chuang an kal khawm a ni. He Campaign hi Pi Zosangzuali Pachuau, BDO Tlangnuam in kaihruaiin Pu L Murray, IFS, DFO Aizawl leh Pu Sangthuama, ASO-I leh OC Sairang ten thusawina an nei a. Ramkang ven leh a lo kan palh pawha thelh turin mitin kan pawimawh zia te, dan pawisa lova ram tikang tu chu na taka an chunga hremna lek anih tur thu te, Kristian kan nihna atang pawhin ramkang venhim hi kan mawhphurhna a nih ziate leh India Constitution ngei pawhin hemi ti tur hian min phut zia te tarlan a ni.

Lo/huan neituten March 15 hma ngeiin Lo hal ngei ngei tur a nih thu te leh a bik takin Lengpui Airport hnaih khua Lengpui, Sairang, Sairang Dinthar, Sihhmui, Nghalchawm, Piggery, Khamrang, Rawpuichhip, Hmunpui, PTC, Mualkhang, Serzawl, Lengte leh Kawnpui te chu tlai dar 3 hnu lamah chuah Lo hal turin hriattir an ni.