Aizawl District Kangmei Venna Hapta (Fire Prevention Week) chu vawiin chawhma dar 11:00 khan District Level Fire Prevention Committee Chairman Pu J.Hmingthanmawia’n Aibawk ah a hawng. Aibawk V.C.Hall-a Kangmei Venna Hapta hawnna hi Aizawl DFO Pu Lalfela’n a kaihruai a, Hapta hawngtu Pu J.Hmingthanmawia, Addl.D.C. ni bawk chuan thusawiin Chalfilh Bial Bye-Election avanga kum dang aia Kangmei Venna Hapta neih tlai a nih thu a sawifiah a, kum kaltaa Mizoram puma Aizawl District chuan kangmei venna kawnga thawk tha ber lawmman a lo dawn tawh chu khawtlang hruaitute, mipui leh sorkar hnathawkte thawhho that vang a ni tiin kumin ah pawh kangmei venga theihtawpa tan laa thawk chhunzawm zel turin kalkhawmte chu a sawm a ni. Kangmei chhuah chhan hrang hrangte tarlangin Pu Hmingthanmawia chuan kan tlangram lo neih dan hmang avanga kangmei a chhuah thin thu te, sorkar flagship programme NLUP tum bulpui ber pawh tlangram lo neih tihtawp a nih thu te a sawifiah bawk a, NLUP tanpuina dawngtute chu sorkar ruahman anga a tihlawhtlingtu nih tum theuh turin a chah bawk. Kangmei-in thing leh mau te a tihchhiat avanga boruak thianghlim siamtu a a chhiat phah zel thu te sawiin boruak tha leh thianghlim siam tura kan ramngaw te humhalha mitin theihtawpa kan tan tlan a tul a ni, a ti bawk.

Addl. S.P. Pu K.Lalremsanga pawhin thusawiin kangmei venna tha ber chu fimkhur tlan a ni, a ti a. Kangmeiin thil a tihchhiat nasat theih zia hriaa kangmei tichhuak tu te chu thuneitute hnenah hriattir zel turin mipui te chu a chah a, chu chuan mitin tan fimkhurna a thlen dawn a ni, a ti. State Level Fire Prevention Committee Member Secretary Pu L.Murray, IFS pawhin Hapta hawnna hi hmanpuiin kangmei hlauhawmna chu a zual zel avanga sorkar leh khawtlang anga a ven nana hma lak thin a nih dan te a sawi lang a, kangmei veng tura mahni ngei chetchhuah inpeih a tul thu a tarlang bawk. DLAO Pi Lalchhandami chuan kangmei ven kawngah Village Council te chu mawhphurtu leh Dan kengkawhtu ber an nih thu sawiin mipui tawiawmna nen tan la tlang zel turin a chah bawk.

District Level Fire Prevention Committee lo rel tawh angin kangmei ven kawnga thawk tha ber khua thlan a ni dawn a, hmun hrang hrangah kangmei ven pawimawhna inhrilhhriatna Awareness Campaign pawh neih tura ruahman a ni. Vawiina Kangmei Venna Hapta hawnna ah hian Aibawk bakah thenawm khua te atangin khawtlang hruaitu leh tlawmngai pawl hruaitu te an kal tha hle a ni.