Mizoram Legislative Assembly Deputy Speaker Pu John Rotluangliana chuan Reiek Block MHIP Conference Ailawng-a neih chu vawiin khan a hmanpui.

Pu John Rotluangliana chuan Mizo hmeichhiate’n hma an sawn nasatzia sawiin sorkar hna hrang hrang thawktu-ah leh zirna lamah pawh mipa aia dinhmun sang zawka ding hmeichhe tam tak an awm tawh, a ti a. Mizoram politics a hmeichhiate’n dinhmun an la luah sang tawk lo chu anmahni lamin tan an lak a, politics tuipuiah an zuan luh ve tak tak a ngai a ni, a ti. Chhungkua a hmeichhe dinhmun pawimawhzia sawiin nute chu nausen kan nih atanga min chawi puitlingtu, engkim min zirtirtu an ni, a ti a. Mizo thalai rual tam tak Pathian rawngbawla ram pawn a an chhuah lai a tualchhung lam thalaite an chau deuh nia lang chu pawi a ti a. Sualna a pung ta ni lovin, thil tisual tu an pung nasa a, hei hi chhungkua atanga siamthat a pawimawh ber a ni tih sawiin Deputy Speaker chuan chhungkua-a nuten tan an lak thar a pawimawh hle a ni, a ti.

Sorkar flagship programme NLUP chungchang sawi langin Deputy Speaker chuan miharsate dawmkanna tur NLUP sem mek hlawhtlinna pawh chhungkua a nute leh hmeichhiate-ah nasa takin a innghat a ni, a ti bawk.

Reiek Block MHIP Conference Ailawng-a neih mek hi March ni 4 khan tan a ni a, March ni 6 khian a tiak ang.