Nimin khan College Veng-ah Aizawl District SSA hmalaknaa buatsaih Aizawl District Football Academy ‘Football House’ chu Education Minister Pu Lalsawta’n a hawng a, hemi rual vek hian Aizawl District SSA hmalakna tho a din CRC-cum-Multipurpose Centre chu Sports Minister Pu Zodintluanga’n a hawng bawk.
 
 

Khuallian Pu Lalsawta chuan thu sawiin Mizoram hmun hrang hranga naupang football lama talent nei tha tak takte tan SSA hmalaknain an lehkha zirna leh football zirna tur Football Academy buatsaih a ni tawh a, an chenna tur ‘Football House’ hmasa ber hawn a ni ve thei ta chu a lawmawm hle a ni, a ti. Mizoramah zirna kalpui dan thlak danglam a ngaih thu sawiin Education Minister chuan Mizoram chu state te, mihring pawh nuai 10 vel chauh awmna a ni a, khawvelin a mamawh mil zela zirna leh thiamna kalpui a nih theih nan thawhhona tha kan neih chuan Mizote chu India ram mai ni lo khawvel pum hriat khawpin hming kan chher thei a ni, a ti a. Mizo ram leh hnam siamthat hna thawh tur chungchang sawiin Pu Lalsawta chuan, “Keini lo, tuin nge? Tunah lo, engtikahnge?” tiin kalkhawmte a cho a ni.

Khualzahawm Sports Minister Pu Zodintluanga chuan Football House hmasa ber hawn a ni ta chu Aizawl leh Mizoram tan ni chhinchhiah tlak a ni tiin SSA hmalakna chungah lawmthu a sawi bawk. Tunlai khawvelah sports chu eizawnna tlak tak tak a ni tawh a, amaherawhchu infiamna lama kalte chu an naupan lai atanga uluk taka zirtir leh chherchhoh a pawimawh a ni, a ti. SSA Sports Academy hrang hranga lut te chu an lehkhazir leh an sports discipline-a zirna atan tul zawng zawng sorkarin a tum sak chu an vanneihzia hriain rilru leh tih takzeta bei turin a fuih a ni.

Aizawl South-I bialtu MLA Pu K. Liantlinga pawhin thu a sawi a, Mizorama kan awh em em thin Football Academy bakah Football House chu College Veng leh bial chhung atan malsawmna a ni, a ti bawk. School Education Director Pi Malsawmthangi, India rama Football Club lar tak tak khel mek Mizo footballer S. Malsawmtluanga leh Robert Lalthlamuana te pawhin Football House hawnna inkhawm chu hmanpuiin fuihna thu tha tak tak an sawi a ni.

Nimina SSA Football House hawn tak hi a chhawnga sak niin a hnuai hi 126 Sq.m. a zau leh a chung hi 330 Sq.m a ni a. July ni 14, 2008 khan sak tan a ni a, 4th May 2009-ah cheng 20,64,878/- sengin sak zawh a ni ta a ni. He Football House-ah hian Kitchen, Dining-cum-Study Hall, Dormitory 2, Toilet leh Bathroom bakah Warden Room a awm a, a theih chuan Gym pawh siam tum a ni. He Football House inenkawlna tur hian kalphung mumal tak siam a ni a, District Education Committee-in enkawlin zirlai naupangte an zirna bakah sports lama an hmasawnnate endik thin a ni dawn a ni. District dang mai bakah rampawn thlenga hruaichhuah thin an ni dawn a, an hriselna lam pawh uluk taka endik thin a ni dawn bawk. Tunah hian zirlai naupang 30 an awm a, hengte hi SSA Football Academy hrang hrang atanga zirlai 280 chuang zetten trial an neihnaa thiam bik thlanchhuahte an ni a. Heng naupang awmte hi awm man leh eitur zawng zawng a thlawna pek vek bakah an sikul kalna tur pawh tumsak vek an ni. SSA chuan thlakhatah Rs.1200/- a tum sak theuh ang a, hemi baka an mamawh chu nu leh paten an tum dawn a ni. Zirlai naupang thiambikte chu state pawna training an neih theih dan tur pawh ngaihtuah sak tum a ni bawk. Heta zirlaite hian Hindi leh English nal taka an thiam theih nan hmalak mek a ni bawk.

CRC-cum-Multipurpose Centre, cheng 8,74,950/- senga sak hi 202 Sq.m. a zau niin Cluster Resource Centre Office - 19 Sq.m., Computer Centre - 32.2 Sq.m. leh Multipurpose Hall-136 Sq.m. te a awm a. Computer Centre-ah hian computer set 10 leh printer dah a ni a, Computer Instructor pakhatin a enkawl mek a, sikul hrang hrang atangin Middle School naupangten compuetr an rawn zir thin a ni. Multipurpose Centre hi zirtirtute training na mai bakah tunah hian SSA Karate Academy chuan zingah training nan an hmang mek a, hei bakah hian khawtlang mipuiten tangkai taka an hman tura ruahman a ni bawk.

Mizoram SSA hnuaiah hian Football Academy-28, Karate Academy-5, Boxing Academy-2, Judo Academy-1, TT Academy-1, Taekwondo Academy-1, Weshu Academy0-1 leh Volleyball Academy-1 din leh enkawl mek a ni.
 
 
 
 
 
 

Attachment

  • Loading attachment...