Mizoram Sports & Yotuh Services hnuaia infiamna chi hrang hranga naupangte zirtirna programme pawimawh leh hlawhtling chho mek 'Catch Them Young' chu vawiin khan Aizawl District huam chhung Football atan bik Sports Minister Zodintluanga'n Vaivakawn Field-ah a hawng. 

Hawnna thu sawiin Sports Minister chuan Mizo thalaite infiamna lamah talent tha tak tak an nei a, thiamna lamah hnamdangte hneh thin mahse "fitness" ah an tluk lo fo chu a ngaihmawh awm  a ni, a ti. Fitness-ah tling lo tan sorkarin sum a sen tulna a awm lova, chhuanlam a awm thei tawh lo, chuvangin Sports Association zawng zawng ten an hnuaia player-te tan fitness ngaih pawimawh hmasakah neih se a duh thu a sawi bawk. Aizawl District Football 'Catch Them Young' hawnnaah naupang an kal thahnem chu lawmawm a tih thu sawiin Pu Zodintluanga chuan Mizo thalaite infiamna lamah an tuihal zia a tilang chiang a ni, a ti a. Nu leh paten sorkar programme leh an fate infiamna lamah an tuipui avangin lawmthu sawiin duhsakna a hlan a, Sports hmanga naupangte discipline leh nungchang tha zirtir chuan ram leh hnam rohlu an tling thei a ni, a ti.

He hunah tel ve Sports & Youth Services Director Pu Zoliana Royte pawhin thu sawiin 'Catch Them Young' a hlawhtling hle a ni tih lanchianna chu veng tinah nghawng a neih dan atang hian a ni, a ti a. He programme-a tel zawng zawngte duhsakna a hlan bawk.

Vawiina hawn tak Aizawl District Football 'Catch Them Young'-ah hian Football Club 26 lai an tel a, Pool 8-ah players te chu then niin heng zing atang hian thiam bikte thlanchhuah an ni ang. Aizawl District Football Association President Pu Jolly Newman chuan football lama talent nei tha naupangte tan he programme hi a chhenfakawm tak zet a nih thu a sawi bawk.