2730/2026-2027

Aizawl, Khuangchawi Thla ni 19, 2026: Vawiin khan District Hub for Empowerment Of Women (DHEW), Women and Child Development hnuaiah District Level Implementing Committee chu Aizawl Additional DC Pu Zoramsiama Hmar hoin DC Conference Hall ah an thukhawm.

Chairman chuan line department-te thawhhona tha tak an neih avanga lawmthu sawiin theihtawp chhuah zel turin a sawm a. Central YMA te leh NGO thawhpui dangte chungah lawmthu a sawi bawk.

Beti Bachao Beti Padhao kaltlanga hmalakna hrang hrang chhawp chhuah niin Awareness Campaign neih dan tur leh inzirtirna kalpui dan tur an rel a.  Education Department, Health Department, Home, Skill Development, UD&PA, Sports Department te kaltlanga tih tur hrang hrang sawrkar laipuiin a bituk te chu uluk taka enho a ni a. Department te hian an hmalak dan tur ruahmanna siamin DLIC hian a enho leh dawn a ni.

Meeting ah hian PMMVY kaltlanga fa nei thar te hnena sawrkarin pawisa a hlan thin Maternity Benefit chungchang sawi niin fatir hringtu nu hnenah cheng 5000, fa pahnihna (hmeichhia a nih chuan) cheng 6000 a nih thu leh hengte hi a hun takah nu ten an dawn theih nan tan lak a tul thu an sawi a. Women & Child Department, Health Department leh bank aiawh ten a chinfel dan tur ruahmanna an siam a ni.