2731/2026-2027

Siaha, the 19th October, 2026: Indian Medical Association (IMA), Mizoram in October Ni 23, 2026 (Zirtawpni) a District Hospital, Siaha kawta Free Medical Camp (A thlawna inentirna) a buatsaih tur chungchang ngaihtuahin vawiin khan DC Conference Hall, Siaha-ah thutkhawm a ni.

Addl. Deputy Commissioner Pu Abraham Beirazi Khithie kaihhruai thutkhawmah hian Free Medical Camp hlawhtling taka buatsaih a nih theih nana hmalakna tur hrang hrang sawiho a ni a. He hun pawimawh tak hi mipui nawlpuiin an hriat zau theih nan leh an chhawr tangkai theih nan nasa taka puanzar ni se, tiin rel a ni.

Addl. DC chuan, Siaha mipuiten khawpui lam pan ngai lova a hmun ngeia mithiam bik (Specialist) inentir theihna hun tha tak an nei tur chu lawmawm a tih thu a sawi a, Siaha District chhung leh a chhehvel mipui zawng zawngte he hun hi tangkai taka hmang turin a sawm a ni.

Free Medical Camp hi District Hospital, Siaha kawt-ah October Ni 23 , 2026 (Zirtawpni) a buatsaih tur a ni a, Zing dar 6:00 atangin registration tih tan tur a ni. Opening ceremony chu Zing dar 7:00 ah neih tur niin Hawnna zawh hian damlo inentir tan nghal a ni ang a, damlo awm dan azirin tlai dar 4:00 thleng awh tura ruahman a ni.

He hunah hian Doctor Specialist mi 64 an tel dawn a,  Speciality hrang hrang-

Cardiology, Orthopaedics, Dermatology, Gynaecology, Psychiatry, ENT, Paediatrics, Ophthalmology, Medicine, Surgery, Pulmonary Medicine, Dental, Pharmacy, bakah Sonologist leh Endoscopy te an tel dawn a ni.

He Free Medical Camp-ah hian damdawi te chu a thlawna sem tur a ni a, Endoscopy leh Ultrasound (USG) te pawh a thlawna tih sak tur a ni. Registration Fee atan erawh mi pakhat tan Rs. 20/- chawi tur a ni.