2364/2022-2023
Aizawl the 18th October 2022 : Vawiin khan Aizawl District Level Standing Committe on Rationalisation of Polling Stations chu an Chairman Aizawl DC/DEO Dr. Lalhriatzuali Ralte, IAS, hovin Aizawl SP Conference Hall-ah an thukhawm a. Election Commission of India duhdan anga kumtina tih thin Electoral Roll Revision chu November-December thla chhunga neih tur a ni a. Hemi atana inbuatsaihna kal mekah, Aizawl District huamchhunga Polling Station 19-te thensawm / voter semdarh (rationalisation) tura rawtna siam chu meeting-ah ngaihtuahho a ni a. Vawiina District Level Committee thukhawm chuan a tlangpuiin an pawmpui a, Polling Station 2 erawh la zirchiang deuh turin an rel.

ECI duhdan angin, Polling Station pakhatah voter 1500 aia tam lo tura duhthusam a nih angin, Aizawl District chhunga voter 1300 aia tam nei mek Polling Station 19-te chu, voter thar thunbelh tur la awm tur nen voter 1500 an pel mai dawn a; chuvangin thensawm / voter semdarh turin rawtna (proposed rationalisation) siam a ni a, heng zinga 15 chu Polling Station thar/hrang tur an ni ang. Rationalisation-in a khawih danglam tur Polling Station-te chu : Leitan Ramthar, Bawngkawn VII, Bawngkawm VIII, Bawngkawn IX, Ramhlun North V, Hunthar III, Zemabawk VIII, Tanhril III, Ainawn Veng I, Ainawn Veng II, Zonuam III, Chawnpui, Dinthar VIII, Dawrpui Vengthar IV, Maubawk IV, Mission Vengthlang V, Bethlehem Vengthlang VI, ITI Veng V leh ITI Veng VI a ni.

Tun dinhmunah hian Aizawl District chhungah a zavaiin Polling Station 305 a awm mek a, Polling Station thar 15 siam a nih chuan a vaiin Polling Station 320 a awm tawh dawn a ni.

Electoral Roll Revision hi thla leh November atangin kalpui tan a ni dawn a. November ni 9, 2022-ah Draft Electoral Roll tarchhuah a ni ang a, November ni 15 atangin Hearing neih tan a ni nghal dawn a, December ni 8 thleng Claims & Objectives thehluh theih a ni ang. Claims & Objectives lut zawng zawng endikna (Hearing) chu December ni 26 thleng a awh ang a, Final Electoral Roll chu January ni 15, 2023 (Pathianni) ah tarchhuah a ni ang. Claims & Objectives thehluh theih hunchhunga thehlut hman lote chuan anmahni bialtu AERO / ERO hnenah kalin mahniin buaipui a ngai dawn a, hun tiam chhung bak BLO-ten an buaipui thei dawn lo a ni.

Vawiina meeting kalkhawm AERO leh ERO te bakah Election kaihhnawih officials te chu Aizawl DC/DEO Dr. Lalhriatzuali Ralte chuan fuihin, Electoral Roll Revision hna chu uluk leh fimkhur taka thawk theuh turin a chah.