2363/2022-2023
Aizawl, 18th October, 2022 : Mizoram University buatsaihin vawiin khan Arya Mess, Mizoram police Headquarters, Khatla-ah ruihhlo ngaite enkawlna kawnga hma latu pawl hrang hrang ten ruihhlo ngai enkawl damte enkawl chhunzawm dan tur chungchangah inrawnkhawmna (Stakeholders Meeting on Substance Use Problems (Aftercare Services) an nei a, Home Minister Pu Lalchamliana chuan he hun hi hman puiin, ruihhlo kaihhnawiha thawktu sawrkar department leh pawl hrang hrang – Health & Family Welfare Department, Social Welfare & Tribal Affairs Department, Excise & Narcotics Department, Police, Mizoram Synod, Central YMA, Synod Hospital, Mizoram Journalists Association te bakah Home/De-addiction Centre hrang hrang aiawhte, mimal mi thahnemngaite an tel a, USA atanga sawm thiamna bik nei Prof. Dace S. Svikis, Virginia Commonwealth University pawh a tel a ni.

He hunah hian khuallian Pu Lalchamliana chuan Mizoram chuan ram dang pahnih Myanmar leh Bangladesh nen ramri thui tak a tawm a, Myanmar leh Bangladesh nena kan inrina lai hian khawvel huapa hriat lar, ruihhlo siam chhuahna leh tawlhna hmunpui “The Golden Triangle” an tih chu a hnaih em em mai a, hei vang hian ruihhlo hi kan hlat ngai lo a ni, a ti a. Theihtawp chhuaha sawrkar, kohhran leh tlawmngai pawlte kan tangho chung pawh hian do rem a harsa em em a, tunhnaiah phei chuan hun dang zawng aiin kan man hnem a, ruihhlo man pawh a tlawm zawk lehnghal a, heim hian suahsual rawngbawlna chi hrang hrang rul rul etc., a tipunlun lehzual ngeiin a rinawm a ni, a ti a. Hriat chinah ruihhlo an man zinga a lian tham deuh hi chu Mizoram pawn leh international market-a hralh tur niin a lang a, chutih rual chuan tualchhunga hralh tur che vel nia lang ringawt pawh hi kan State chhunga mihring cheng zat nen chhut chuan a tam tam hle a ni, a ti bawk.

Pu Lalchamliana chuan sawrkar department hrang hrang Police, Excise & Narcotics, Health & Family Welfare, Social Welfare & Tribal Affairs etc., bakah kohhran leh tlawmngai pawlte, NGO leh Voluntary Organisation te, mimal thahnemngai ten kan theihna chin chinah hma kan la a, thahnem pawh kan ngaiin hna pawh kan thawk tam a, heti chung hian kan thawh nasat zual deuh deuh chu a la ngai dawn tih a lang reng a, vawiina in rawnkhawmna pawh hian ruihhlo ngaite leh helama inhnamhnawihten sim duha inenkawlna hmun camping, de-addiction centre etc., an pan a, hlawhtling nia in hria a an chhuahsan hnu a ruihhlo an bansan hlen theihna tura awmze neia hmalak dan tur an sawiho dawn nia a hratin lawmawm a tih thu a sawi a, helama hma la titen hruikhat vuana thawhhona tha tak nena an tan tlan phawt chuan ruihho laka kan buaina chinfel kawngah awmzia a neih ngei a rin thu a sawi bawk a ni.

Mizorama ruihhlo ngaite enkawl dan chungchangah btun aia awmzw nei zawk leh mumal zawka hmalak a nih theihnan Mizoram University hnuaia Department of Psychology chuan “Fulbright Specialist Program” kaltlangin kar hmasa khan evidence-based therapy/treatment of addiction training chi khat, khawvela an hma lar em em “Motivational Interviewing” an buatsaih a, hetah hian Prof. Dace S. Svikis, Virginia Commonwealth University, USA chuan training hi kaihruaiin Health & Family Welfare Department, Social Welfare & Tribal Affairs Department, 1st IR Batallion, MZU (Psychology & Clinical Psychology Departments), Synod Hospital, Aizawl Theological College leh NGO hrang hrang aiawh te an tel a ni.

Vawiin inrawnkhawmna ah hian zau takin sawihona neih a ni a, hemi hnu hian kalkhawmte chuan ruihhlo ngaite, in enkawlna hmun atanga an chhuah hnu a ruihhlo an bansan hlen theihna tur atana hmalakho tha an ti tlang a, “Collaboration Structured Strategy for Aftercare” duan tha tih niin hemi atan hian zau zawka inrawnkhawm leh thuai an tum a ni.

Vawiin hun hi Prof. Lalnundanga, Registrar, MZU chuan a kaihruai a, MZU Vice-Chancellor Prof. K. R. S. Sambasiva Rao chuan inlawmna thu sawiin, Prof. Dace S. Svikis, Virginia Commonwealth University, USA leh Prof. HK Laldinpuii Fente, Department of Psychology, MZU te kaihhruaiin sawihona hun hman a ni a. Prof. Zoengpari, HoD, Department of Psychology, MZU in lawmthu sawina hun hmangin a khar a ni.