2362/2022-2023
Aizawl, the 18th October 2022 : Mizoram Finance Commission 2-na in vawiin khan Aijal Club ah Sawrkar in sumpai a thawhchhuah dinhmun, State Sawrkar sum thawhchhuah atanga tualchhung inrelbawlna – Village Council, Municipal body leh Autonomous District Council 3 te hnena sum leh paia a puih dan leh heng insem dan leh sum an thawhchhuah belh thei dan bakah 2nd Mizoram Finance Commission hnathawhnaa Terms of Reference inhrilhfiahna leh sawizauna hun ‘Workshop on State Finances, Resource Mobilization for Local Bodies and Terms of Reference of the 2nd Mizoram Finance Commission’ tih chu an buatsaih.

Pu F. Vanlalruata 2nd Mizoram Finance Commission (MFC) Chairman chuan thuhmaruai sawiin State Finance Commission hnathawh dan leh an mawhphurna te tarlangin Workshop a tel te chu sawihonaah zau taka an ngaihdan leh rawtna te sawi turin a sawm a. Pu Lalrohlua, Deputy Secretary, 2nd MFC chuan Workshop thupui chungchang sawi zauna leh hemi chungchanga thil pawimawh te tarlangin hun a hmang a. Pu Lalmalsawma, Member Secretary, 2nd MFC chuan sawiho tur atana thuchhawp chhuahte sawi hawngin Workshop a tel te chu an ngaihdan te sawi turin a sawm a ni.

Chhiah atanga Sawrkar sum thawhchhuah State’s Own Tax Revenue bakah chhiah nilo State Sawrkar sum thawhchhuah State’s Own Non Tax Revenue a sum te chu tualchhuang inrelbawlbna te nen insem theih dan a awm thei em tih te, ADC 3 te hnena sum an chan tur ruahman kawnga tehfung hman mek chungchangte, Mizorama Municipal body 2 te tana sum ruahman leh pek kawnga tehfung hman mek chungchangte, Village Council, Urban Local Bodies leh ADC ten tuna sumhnar an neih bak, sum hnar dang chhiah emaw chhiah nilo emaw atanga sum an thawhchhuah thei dan kawngte bakah State Sawrkar in chhiah nilo non tax revenue atangin sum thawhchhuah belh a nei theih dan kawngte chu zau taka sawihona ni.

Workshop a tarlan danin kum 2015-16 ah chhiah atanga Sawrkar sum thawhchhuah State’s Own Tax Revenue chu vaibelchhe 358.42 a ni a, hei hi kum 2020-21 ah chuan vaibelchhe 647.56 ah pungin chho in hemi inkarah a pun dan chu chawhrualin kumtin za zela 12.56 in a pung a. State’s Own Tax Revenue ah sum lut tam ber chu State Goods & Services Tax niin hei hi tun kum hnih kalta khan za zela 70 bawr vel a ni a. Kum 2015-16 khan chhiah nilo atanga Sawrkar sum thawhchhuah State’s Own Non Tax Revenue chu vaibelchhe 297.63 a ni a, hei hi kum 2020-21 ah chuan vaibelchhe 561.76 ah pungin chho in hemi inkarah a pun dan chu chawhrualin kumtin za zela 13.55 a ni.