2361/2022-2023
Aizawl the 18th October, 2022 : Vawiin khan Health Minister Dr R.Lalthangliana chuan State Drugs Testing Laboratory building thar chu MINECO-ah a hawng.

Dr R.Lalthangliana chuan damdawi enfiahna leh zirchiana tur State Drugs Testing Laboratory changtlung tak hawn a ni ta chu lawmawm tiin Mizoram mipui ten tangkai taka an hman ngei a beisei thu a sawi a. He project a puitlin theihna tura hma an lak dan te sawiin thawktu zawng zawng te chungah lawmthu a sawi a ni. Health Minister chuan COVID hripuiin Mizoram a tihbuai avangin Health Department hnuaia post 734 hnawhkhah tur, Mizoram Sawrkarin phalna a pek vek tawh, a hlawhtling thei ta lo chu pawi a tihzia he hunah hian a sawi a. Chutihrual erawh chuan he hripui leng avang hian kawng dangah malsawmna tam tak Health Department in a dawng thung a ni, a ti. Hripui leng karah SRHF-ZMC ah ICU khum 13 atangin sawmnga dawnah tihpun a ni a, ward dangah khum 150 bawr vel awm thin kha 400 bawrah a chho a, building chung ber siam mek niin chumi peihfel a nih hunah phei chuan khum 500 a kai dawn niin Minister chuan a sawi. ZMC ah vek hian Genome Sequencing Laboratory hawn a ni a, boys leh girls hostel sak zawh niin building thar dang sak mek a ni bawk a, ZMC ah leh Aizawl Civil Hospital-a oxygen plant te chu tih len a nih bakah district tinah Oxygen Plant dah a ni bawk, Dr R.Lalthangliana chuan a ti.

Mizoram chhunga Health Sub Centre te chu Health & Wellness Centre ah hlankai a nih thu te, Aizawl Civil Hospital-ah Trauma Centre changtlung tak siam mek a nih thu te, district hospital hrang hrangah trauma centre awn a nih thu te Health Minister chuan a sawi a. Siaha, Lawngtlai leh Champhaiah District Hospital hawna a ni tawh a; Serchhipah leh Kolasibah sakna tur sum hmuh a ni tawh, a ti a. Zemabawkah Cancer Superspeciality Hospital thar, cheng vaibelchhe 700 senna tur pawh ruahmanna chak takin a kal mek zel a ni, a ti bawk.

Sawrkar Laipui Centrally Sponsored Scheme (CSS) chi khat Strengthening of Drugs Regulatory System hnuaiah State Drugs Testing Laboratory sakna atan hian sum cheng vaibelchhe 480 hmuh a ni a. Hei hian builiding sakna senso te, he laboratory in bungrua leh khawl thil chi hrang hrang a mamawh leina tur leh thawktu kum 3 chhung atana rawihna tur a tel a ni. A building sak hna hi kum 2019, December ni 2 khan bultan a ni a. November ni 19, 2021 ah sak zawh fel niin sum senso hi cheng buai 245.16 a ni. He laboratory a khawl pawimawh awm te bun (install) tu tur hi phailam atangin an rawn kal dawn a, puja chawlh zawh hnuah lo kal thei tura beisei an ni tih hawnna inkhawmah hian sawilan a ni.

Health Minister in a hawn tak building thar hian chhawng hnih a nei a. A chhawng chung zawkah hian Chemical Reageant dahthatna te, hmanraw dahkhawmna te, sample & drugs section te, Chemical Analysis Room te leh Microbiology Section te a awm a. A hnuai zawkah hian sample store room leh office pui ber dah a ni. State Drugs Testing Laboratory a hman tur khawl changkang leh manto chi 31 dah a ni a. Damdawi (drugs) tha leh tha lo en nan te, a lem leh a tak finfiah nan te, a him leh him loh en nan te, ram dang atanga rawn lut damdawi te a hman ngam em tih enfiahna atan te hman theih a ni dawn a. He laboratory hi changtlung taka siam leh thuam a nih avangin damdawi endik theih loh a nei lo tura ngaih a ni.

Vawiin programme hi Health & Family Welfare Department Principal Secretary Pi Esther Lalruatkimi’n a kaihruai a. Joint Director (Food & Drugs) Pu Lalsawma Pachuau chuan project report a pe a, Health & Family Welfare Department Executive Engineer Pu Lalfakzuala’n technical report a pe a. Principal Director Dr T.Lalhmangaihi’n lawmthu sawiin hun hnung a khar a ni.