Aizawl District Level Swachh Bharat Mission (Gramin) Committee chu an Chairman Aizawl DC Pu Kannan Gopinathan, IAS hovin a pisa-ah kum 2016-2017 chhunga an hnathawh tawhte thlirhona leh hmalakna tur la awm te sawiin an thukhawm.

Swachh Bharat Mission (Gramin) hnuaiah hian khawtlang faina leh thianghlimna kawnga hmalakna pawimawh tak pakhat chu chhungkua zawng zawngin inthiarna mumal an neih a, ram pum chu zun leh ek kawnga fihlim, Open Defecation Free (ODP) a inpuan tum a ni a. Hemi kawngah hian Aizawl District chu kumin chhhung hian ODF a inpuang hman tura hmalak tum anih thu leh, district chhungah tun dinhmunah chhungkua 2,065 chu ek-in mumal (sanitary) la neilo an awm thu meeting-ah hian tarlan a ni.

Committee Chairman Aizawl DC chuan Swachh Bharat hmalaknate hi a nodal department ten anmahni lawnga thawk lova, a theihna apianga scheme dang nena thlungdun (converge) zel nise a tih thu a sawi a. Vawiin meeting pawh hian bawlhhlawh sawngbawlna hmun (Solid and Liquid Waste Management or SLWM) khua 20 chuang a sak hmabak la awm chu MGNREGA hmalakna nen thawhho dan tur sawiho a ni a. Hemi bakah vawiin meeting hian Community Sanitary Complex (CSC) la sak tur awm te, mipuite hnena zau zawka inhrilhhriatna kalpui leh Aizawl District chu ODF a puang tura hmalak dan tur te sawiho a ni.

ODF endik tur hian Block level, District Level leh State Level-ah endiktu Verification Team din a ni a. Aizawl District chhunga khaw 94-ah 2011 census a lan dan in chhungkua 82,524 awmin, heng zingah hian chhungkua 2,065 in inthiarna hmantlak leh thianghlim an la neilo a. SBM hnauiah hian pit-latrine hi inthiarna mumal ah chhiar a nilo a ni a, open-defecation free a inpuang tur hian inthiarna hmantlak, tho leh rannungin a bawm theihloh neih bakah a hmangtuten an hman zawha sahbawn nen kut silfai nachang an hre tur a ni.