Sorkar laipui sum hmanga thingtlang mipui te chawikanna leh tihhmasawnna tura kawng hrang hranga hnathawh leh hmalak dan te vil tu District Level Vigilance and Monitoring Committee chu vawiin chhun khan Aijal Conference Hall ah Co-Chairman Pu Lalhmingliana, M.P. (Rajya Sabha) hovin an thukhawm. Meeting ah hian meeting hmasa thurel te bawhzui a nih dante an thlirlet a, a tul anga bawhzui chhoh zel ni se an ti.

Thingtlang mite inhlawhna tur ruahman sakna MGNREGS hmangin December, 2013 thleng khan Aizawl District huama RD Block 7 ah Job Card nei 25,964 an awm a, ni 45 inhlawhna siamsakin sum Rs 21,67,62,403 /- sen a ni tawh a ni. Mi rethei in sak sakna Indira Awaas Yojana (IAY)  hmangin kum 2013-2014 chhung hian in 204 sak thar a ni a, Rs 155.618 lakhs sum sen a ni tawh bawk. Integrated Watershed Management Programme (IWMP) hmanga hmalakna atan Aizawl District pumpui hi Project 19 ah then a ni a, market shed, tuikhuah, tuilakna, terrace, check dam, tuizem, puanthui zirna siam te bakah thing phun leh thei leh thlai chinna te buatsaihin loneitu te tan training te buatsaih thin a ni a, heng Project hnuaia hmalak dan te report ngaihthlak a ni bawk. Thingtlang inkalpawhna kawngpui siamna PMGSY hnuaia Project 44 neih zingah 38 thawh zawh tawh a ni a, 6 chu thawh chhoh mek a ni. Thingtlang mite tui in tur pekna National Rural Drinking Water Programme (NRDWP) hmangin tui in tur hnianghnar khaw tinin an neih vek theih nan hmalak chhoh mek reng a ni a, inthiarna thianghlim ruahmanna Total Sanitation Campaign (TSC) hnuaiah Aibawk, Darlawn, Phullen, Thingsulthliah leh Tlangnuam RD Block huam chhungah December 31, 2013 thleng khan ekin 483 sak a ni a, school 40 ah ekin siam tawhin khaw 12 te hnenah khaw fai lawmman pek an ni tawh bawk. National Social Assistance Programme (NSAP) hnuaiah ni 31 December, 2013 thleng khan Mizoram pumah tar pension mi 9203 hnenah pek an ni a, hmeithai pension mi 627 leh rualbanlo mi 199 hnenah pek an ni a, sum Rs 695 lakhs hmuh tawh ah Rs 669.02 lakhs sen a ni tawh bawk. RGGVY hnuaiah hemi hun chhung hian khaw 46 kawlphetha pek an ni bawk.

Chairman Pu Lalhmingliana chuan sum tam tak senga mipui hamthat nana sorkar hmalakna hrang hrang te chu uluk taka vil turin official kalkhawm te chu a chah a, member te leh a kaihnawih department hrang hrang officer te chungah thingtlang mi te chawikan nana sorkar hmalakna tihhlawhtling tura an thawhna leh tawiawmna te avangin lawmthu a sawi a, sorkar laipui atanga sum lo kal te chu luang ral mai mai lova mipui ten an chhawr tangkai ngei theih nana theihtawp chhuaha, an finna leh thiamna te mipui tan hmang chhunzawm zel turin kalkhawm te chu a fuih bawk.

Meeting hmanpuitu Rural Developmnent Minister Pu R.Lalzirliana chuan mipui hamthatna tura sum tam tak lo kal chuan mipui rilru a tichhe thei tiin hnathawk peih lo, thawk mang  lova sum lakluh tumna rilru chu paiha, sorkar official te pawhin huaisen taka hma an lak ngam zel a pawimawh thu te a tarlang a, Food, Civil Supplies & Consumer Affairs Minister Pu John Rotluangliana pawhin tanpuina sum dawn te chu rinawm leh dik taka thawk tura mitin kan tan tlan a pawimawh thu leh, thingtlang mipui te chawikan nana sorkar hmalakna hrang hrang te chu bialtu MLA te hriattir zela hmalak a pawimawh thu te a sawi bawk.