Sorkar laipui sum ruahmana thingtlang mipui hmasawnna kawng hrang hrang thawh endik leh viltu Aizawl District huap District Level Vigilance and Monitoring Committee chu vawiin khan an Chairman Lok Sabha MP Pu C.L Ruala hovin DRDA Conference Hall-ah an thukhawm a, District huamchhung MLA zingah Parliamentary Secretary Pu KS Thanga, Deputy Chief Whip, Pu RL Pianmawia, Law Commission Chairman Pu RL Rinawma, Mizoram KVI Board Chairman Pu K. Lianzuala leh Pu Lalduhawma te an tel a. An member zing ami boral ta Chalfilh bialtu Parliamentary Secretary Pu Chawngtinthanga sunna hun an hmang.
Vawiin thutkhawmah hian Chairman Pu C.L Ruala chuan District Level Vigilance and Monitoring Committee din leh a hnathawh tura ruat chhan pawimawh hrang hrang te a tarlang hmasa a. Hmasawnna tura sum ruahman reng reng dik tak leh a nihna tur ngeia hman a pawimawh thu te, heng sum khawihtu sorkar department leh officer te mawhphurhna sanzia sawi nawnin thingtlang mipui ten a nihna tur ang takin heng ruahmanna te hi an tangkaipui em tih chu uluk taka vil a tul a ni, a ti.
Meeting hmasa lama an thurel bawhzui tura dah te an thlir hmasa a, district hrang hranga job card pek chhuah dan te sawilangin Aizawl District bikah chuan Municipal huamchin khaw engemawzat a awm avangin job card pekchhuah danah District dang nen ang khata a kal theihloh thu te, job card lem erawh awmlo nia an hriat thu te sawilan a ni.
Vawiin meeting ah hian ni 100 inhlawhna tia hriat lar thin thingtlang khua te tana mipui chhawr theih rotling thilsiam nana mipui inhlawhfakna MGNREGS te; mirethei chenna in neilo te tana in sakna tur IAY te; thingtlang khaw kar kawng siamna tur PMGSY te; leilet leh luidung cheibawlna tur IWDP leh IWMP te; Self -Help Group hmalakna tur SGSY leh thingtlang khaw tui intur pekna ARWSP hmalak dan chipchiar takin sawiho a ni a. Thingtlang khua te faina leh thianghlimna kawnga ruahmanna kalpui mek Total Sanitation Campaign leh District Rural Development Agency inrelbawl dan te pawh vawiin meeting-ah hian sawiho an ni bawk.
Vawiin meeting-ah hian Aizawl District huamchhunga BDO hrang hrang, department kaihhnawih aiawh bakah tlawmngaipawl aiawh te member an nih angin an tel tha hle a ni.
