Vawiin khan Kolasib-ah Faina Hapta hman mek chu khar a nita a, kharna inkhawm Shopping Centre-a neih chu Pu R. Lalhmuliana, Jt. Director, UD&PA in a hmanpui a ni.

Khuallian chuan thuchah sawiin, Mizote hi kan pi/pu hunah chuan Faina tih hian hmun a luah meuh lova. Tunah erawh chuan kanlo thianghlim ta hle a ni, a ti a. Faina chungchang hi sawi tam hle tawh mah ila a hmun lova vawm thla hram duh/ chhak hram duh kanla awm a. Kan thinlungin heng tihdan thalo tehi a hnualsuat a, faina kan nunpui a tul ta hle a ni, a ti. Kolasib chu thiamna hmanga Bawlhhlawh paih dan Solid Waste Management a taka hmang hmasa- Pilot Project experiment tihna tura Sawrkarin a ngaih khua a ni, Pu Hmu-a chuan a ti a. Khawpui chhung leh a vela thing hringte cheibawla enkawl zui theih anla neih avanga vannei a tih thu pawh a sawi a ni.

Pu Andrew Lalhruaia, DUDO chuan Faina Hapta hman dan tlangpui sawiin hemi atana sum ruahman Rs 1,00,000 chu Kawnpui leh Vairengte khuaahte sah then a niin DRDA in Rs 20,000/ lai an thawh belh avanga a lawmthu a sawi a. Week chhunga Talk Show ‘Faina lamtluang zawhin Kolasib mipuite’ tih thupui hmanga Cable TV tea tih chhuah chu miten an hlut hle tih a sawi a. YMA, VC leh mipui tanhona a duhawm hle a ni, a ti.

Hapta chhunga endiktute aiawh Er. Zothansanga chuan an endik dan tlangpui a sawi a. Pi Lallianpuiin Lawmman dawngtute a puang a. Pu S. Lalhmachhuana, MJA President-in Week kharna inkhawm hi a kaihruai a ni.

Lawmman latute chu :- Veng fai- 1na College Veng Branch YMA, 2na – Tumpui Branch YMA leh 3na Project Veng Branch YMA an ni.

High School & above-ah 1na- HT High School Tumpui, 2na SJHSS, 3na- Govt Diakkawn H/S te an ni.

Elementary School-ah 1na- Govt. TS Luaia M/S Rengtekawn 2na- Govt. Selluaii M/S Kolasib leh 3na Govt. Primary School X Saidan te an ni.

Heng category thuma lawman latute hi Rs 5000/,- 3000/ -,2000/-leh certificate pek an ni.

Office fai berah PWD, Kolasib Division, 2na DIET leh 3na- SP Office leh 3na tho Minor Irrigation te hnenah Certificate hlan a ni bawk a. Hapta hawnna nia bawlhhlawh char hnatlanga thawk chhuakte Govt. Diakkawn M/S leh Govt. Middle School Banglakawn te hnenah Special prize hlan a ni bawk a ni.