Kar kalta ni 2 October 2012 atanga Mizorama Faina Hapta hman chu vawiin chawhnu dar 1:00 khan Aizawl Vanapa Hall-a inkhawm buatsaih ah kharna hun hman a ni a, Mizoram Legislative Assembly Speaker Pu R.Romawia’n a hmanpui a ni.

Khuallian Pu R. Romawia chuan Mizo te hi zirtirtu leh hruaitu tha hnuaiah chuan kaihhruai nuam tak hnam kan nih thu sawiin mihring te tana thil tha lo zuk leh hmuam do kawngah pawh zirtirna tha kalpui a nih chuan a sawt hle a ni, a ti a. Chutiang bawkin ruihtheih thil leh zu chungchangah pawh hian tun aia chak inzirtirna kan neih phawt chuan hei ai hian a sawt ngei a rin thu a sawi a. Pa hlawhtling, dam rei leh fate chher puitlin duh chuan ruihtheih thil, zuk leh hmuamah a inthiarfihlim a ngai a ni, a ti. Pu R.Romawia chuan faina leh thianghlimna kawngah hian zir tur hmabak a la tam hle thu sawiin faina hapta hi bul tan nan hmang theuh turin kalkhawmte a fuih.

Inkhawm kaihruaitu UD&PA Principal Secretary Pu R.L.Rinawma, IRS chuan Faina Hapta huaihawttu AMC chu naupang te thawh tur leh hmabak ngah tak, khawpui than len nana thil pawimawh leh tangkai tak si a nih thu a sawi a. Faina leh thianghlimna kawngah pawnlam lan dan mai bakah chhungril lam thlenga fai pawimawh thu te, a bik takin damdawiin thli leh tawmhnawk senghawi kawngah chak lehzuala hmalak a tul thu te a sawi a ni.

Faina Hapta hman dan tlangpui sawitu AMC CEO Pu Nghaklianmawia chuan 1977 atangin Faina Hapta hi Mizoram ah hman thin a nih dan te, tun tum hi AMC huaihawta hman hmasak ber a nih thu leh Aizawl khawpui veng tinin kut an thlak uar ber tum a nih dante a sawifiah a. Sorkar laipui Urban Local Bodies Fund atanga khawui bawlhhlawh thenfai nan thla tin Rs 25 lakhs vel hman a nih an leh 10 % chu sorkar phut anga chhungkaw tinin an thawhlawm ve dan te a sawi a. Hetiang taka hmalakna chak kalpui zel a nih chuan Aizawl khawpui hian hmarchak state mai bakah ram pum huap pawhin khawpui fai ber nih a hlawh mai theih a beisei thu a sawi. Faina chawlhkar hman chhunga faina kawnga inelna hrang hranga ti tha te hnenah AMC Councillor ten lawmman an hlan a, lawmman dawngtu te chu hengte hi an ni :-

Local Counci Veng Fai : 1) Pakhatna - Sakawrtuichhun: 2)l Pahnihna - Govt. Complex: 3) Pathumna - Dinthar;

 Local Council Hotel Fai :1) Pakhatna - Hotel Chief, Zarkawt; 2) Pahnihna - Hotel Arini, Upper Khatla; 3)Pathumna - Hotel Sangchia, Zarkawt

Govt. High School Fai: 1) Pakhatna - Govt. Bethlehem High School; 2) Pahnihna - Govt. K.M.High School 3) Pathumna - Govt. Sakawrtuichhun High School.