Vawiin chawhma dar 11:30 khan National Informatic Centre (NIC) Aizawl District website chu Pu C. Thanchhuma, Deputy Commissioner Aizawl District chuan D.C. Complex ah a hawng.

 

 

Aizawl District NIC Officer Pi Vanlalvuli chuan he hawnna inkhawm tawite hi a kaihruai a, Pu Jacob Lalhnehliana, Network Engineer chuan he website an buatsaih dante a sawifiah a ni.

Pu C. Thanchhuma chuan hawnna thu sawiin, beisei phak loh a a ngaih website, DC Office pawhin an chhawr tangkai em em tur hawn theih a lo ni ta chu lawmawm a tih thu sawiin, “Khawvel inkal pawhna, thlawhna, lawng, motor te bakah chuan computer hmanga internet a inkalpawh hi a tangkai em em a, a rang bawk a ni” a ti.

Officer leh staff hrang hrangte pawhin computer pawimawh tak hi zirthiam a tul tih thu sawiin, “Hetiang ti thei lo nih chu mi anglo nihna a ni tan tawh a, election ah te pawh hriat phak loh khawp a tangkaiin NIC hmang hian computer kan tangkai pui a ni” tih DC chuan a sawi bawk.

He website ah hian Aizawl District Deptt. hrang hrangte a hmun leh hma thlalak pawimawh tak takte leh chanchin a en theih reng dawn a, news tharlamte pawh a en theih dawn a ni. DC Office atanga application form hrang hrangte pawh mipui tan a awmsam zawk nan download theih a buatsaih tum a ni bawk.