awiin chawhma dar 11 khan Assembly Conference Hall-ah Aizawl District NLUP Monitoring Committee chu an Chairman Lt. Col. Z.S. Zuala, MLA hovin an thukhawm a, NLUP kalpui mek dinhmun te thlir hovin a vil hna an thawh dan turte leh hriat tur tul hrang hrang te an inhrilhfiah.

Mizoram sorkar flagship programme NLUP hlawhtlinna atana Monitoring Committee mawhphurhna san thu sawiin Lt. Col. Z.S. Zuala chuan mi rethei leh kuthnathawktute chhanchhuahna programme a nih hre renga theihtawp chhuah turin Member kalkhawmte chu a fuih a. Co-Chairman Aizawl DC Pu Shurbir Singh, IAS pawhin fuihna thu sawiin NLUP chu Mizoram sorkar programme pawimawh berte zinga mi anih avangin uluk tak leh taima taka bawhzui tur ani, a ti a. Monitoring Committee chuan ngun taka vil hna te thawka report te uluk taka ziak thin turin a chah a, an hmalakna kawnga harsatna an tawk a nih chuan englai pawha amah chu phone-a rawn theih reng a nih thu a hrilh.

NLUP Implementing Board Secretary Pu Zorammuana chuan NLUP tobul leh kalphungte a sawifiah a, NLUP tanpuina dawngtute chu an thawk tha lo a nih chuan tanpuina pek chhunzawm tawh loh mai tur a ni tiin Monitoring Committee te chu huai tak leh dik taka hma la thin turin a ngen bawk.

Vawiin Meeting ah hian District Level Monitoring Committee Member atana ruat mi 42 te bakah Line department officer te sawm tel an ni a, Village Level Monitoring Committee hnathawh tan tir chungchang te sawihovin hriat chian loh lai te inzawtin an in hrilhfiah a. Tunah hian Line department 8 ten an hnuaia beneficiaries te first instalment an pe deuh vek tawh a, a then chuan second instalment pawh an pe chhunzawm chho mek bawk. Industries department bikah chuan tlema siam rem ngaite a la awm avangin an la sem kim thei hrih lo a ni.