Cricket Association of Mizoram (CAM) chuan vawiin chawhnu dar 1.30 khan Tourists’ Lodge, Chaltlang-ah Annual General Body Meeting 2011 an nei a; he hun hi Chief Minister Pu Lal Thanhawla, CAM President ni bawk chuan a hmanpui a ni.

Pu Lal Thanhawla chuan, “Mizoram sawrkar chuan thalaite khawvel thar siam tumin ngaihtuahna nasa tak a seng mek zel a; Mizo thalaite hi infiamna kawng tinrengah hmingchher thei tur khawpa talent tha nei kan ni tih a chiang a, chutiang talent tha chu cho chhuah kan tum a ni. Nimahsela, duh thala hman tur sum leh pai kan neih rih loh avangin duhthusamin kan kal chak thei rih lo a ni” a ti. CAM hruaitute taimakna leh inpekna ropui a tih thu sawiin, “Sawrkar rinchhan lova association-in mahni khelmual tur Sihhmui hmuna in buatsaih thei hian CAM hruaitute leh member-te inpekna faktlak a nihzia a lantir a; phal taka stadium sakna tur hmun petute inpekna pawh a ropui a ni” Chief Minister chuan a ti a. Infiamna uar deuh deuh chu khawtlang nun siamthatna atana thil tangkai tak a nih thu sawiin Pu Lal Thanhawla chuan, “Kan thatlai hun hi thisen lum lai leh taksa chakvak lai a ni a; chuvang chuan kan awm mai mai hian sual kawng zawh a awlsam a ni” a ti. CAM hruaitute leh member-te chu Mizoram-a cricket infiamna a lo lar zual zel theihna tura theihtawp chhuah chhunzawm zel tura chahin, “Mipui mimirin kan buaipui tham tura Cricket hi kan vuak vul a tul a; chutianga naupang thlenga kan tuipui phawt chuan kan nghahhlelh em em Board of Cricket Control in India (BCCI) hnuaia affiliated member nihna pawh kan nei ve thuai ngei ang tih a rinawm a. Tunah pawh BCCI lam chuan tunhma zawng aiin min ngaihvenin, min ngaihsak tawh a ni” a ti.

Vawiina CAM General Body meeting hi an pawl vice-president Pu Lalrochuanga Pachuau chuan a kaihruai a; Mizoram hmun hrang hrang atangin affiliated club aiawhte an kal tha hle a ni. Meeting-ah hian CAM Constitution siam that chungchang leh thil pawimawh dangte ngaihtuah a ni. CAM-ah hian affiliated club Ist Division-ah 8, 2nd Division-ah District Association leh Club 12 an awm a, 3rd Division-ah Club in register tharte leh club hnuaihnung deuh engemaw zat an awm bawk a ni. Sihhmui-a Suaka Memorial Cricket Stadium sak mek chu tunah hian a chul mam hnuhnung ber hna hmabak a la ni a; kumin October thla hian season thar khelhna atana hman hman an inbeisei a ni. He stadium-ah hian cricket pitch 8 siam mek a ni.