Aizawl District chu Open Defecation Free (ODF) a puan a nih hnuin vawiin khan ODF Certificate hlanna hun Aizawl District Deputy Commissioner Conference Hall ah neih a ni.

Swachh Bharat Mission (Gramin) SBM-G, Mission Director Er.HC Lalnunzira chuan ODF Certificate hi Aizawl District pumpui tan Bawrhsap Pu Vanlalngaihsaka leh SBM-G Aizawl District Member Secretary Er.Lalsanga te hnenah a hlan a . Project Director RD, Aizawl District hnuaia BDO zawng zawng leh SDO te hnenah a hlan bawk a ni.

Aizawl District Rural Area chhungah hian chhungkaw 17,328 an awm a, PHED in 2012-a a zir chian danin chhungkaw 1517 ten inthiarna hmun mumal an nei lo a ni. Swachh Bharat Mission (Gramin) ruahmanna hnuaiah hmalak niin, Ministry of Drinking & Water Sanitation, Govt.of India chuan 18.3.2017 khan Open Defecation Free ah Aizawl hi a rawn puang a, tehna hrang hranga State Level Team ten an endik leh hnuin 6/12/18 khan ODF ah hian puan a lo ni ta a ni. Tun dinhmunah chuan India ramah Mizoram chu a ti tha pawl ala ni zel a, State 29 zingah 14-na dinhmun a hauh mek a ni.