Nimin khan Aizawl Cily Traffic Police te chuan Vanapa Hall ah General Roll Call/Briefing/Sammellan an nei a. Aizawl Traffic Police a awm zawng zawng mi 400 vel kalin infuihtharna leh thil pawimawh hrang hrang inhrilhhriatna hun hman niin, Pu L.H. Shanliana, IPS, IGP (L&O), Mizoram leh Pu Lalbiakthanga Khiangte, IPS, DIGP (NR), Mizoram ten he hun hi an hmanpui a ni.

Pu L.H. Shanliana, IPS, IGP (L&O), Mizoram chuan fuihna thu sawiin Aizawl City Traffic Police ten hun chep tak kara kokim tak a inhmuhkhawmna hun an buatsaih thei chu lawmawm a tih thu a sawi a. Lirthei tawt lutuk tih ziaawm nan Traffic Police te nasa zawka hma la turin a fuih a, Aizawl khawpui chhunga State dang lirthei lokal lirthei tlan dan an hriatloh avanga dan bawhchhe palh te man nghal mai lova tlan dan dik zawk an hrilh hre thin chu lawmawm a tih thu a sawi bakah Traffic Rules and Regulations chungchang tun aia nasa zawka awareness campaign neih a pawimawh thu a sawi bawk. Aizawl khawpui chu India ramah Most Disciplined Traffic City leh No Honking City anih thu leh hei hi vawng nung reng tura theihtawp chhuah zel turin Traffic Police te a fuih bawk a ni.

Pu Lalbiakthanga Khiangte, IPS, DIGP (NR), Mizoram pawhin Aizawl City Traffic Police-te chu Mizoram Police hmel lanna pawimawh tak an nih avangin zahawm leh felfai taka Uniform inbel thin tur leh ruihtheih thil laka fihlim turin a fuih bawk.

Nimin aizawl City Traffic police-te inhmuhkhawmna ah hian Traffic Dan Iekkawh chungchanga hmalak mek ah midangte tana harsatna thIen thin chi hrang hrang hrang sawiho a ni a, a bik takin Double Overtaking, lirthei silencer ring lutuk (Original exhaust pipe nilo), duhdah tak a lirthei park (Obstructive Parking) leh lirthei headlight eng lutuk (LED light vuah chawp) chungchangah nasa zawka tan lak nise an ti a. Traffic Dan hrang hrang bawhchhiate manchhuah a hrem an nih theih nan nasa lehzual a hmalak chhunzawm zel an tum a ni.

Pu Rodingliana Chawngthu, Sr. SP, Traffic chuan Traffic Police te chu nitin duty chhuak reng thin an nih avangin an hna tibuailo thei ang berin an hunawl neih chhun Pathianni chhun Dar 12:00 leh chawhnu Dar 3:30 inkarah he hun hi buatsaih anih thu a sawi a, Pu Zoramthanga Pautu, Addl. SP, Traffic, Pu Jacob Hlychho, Dy. SP (Hqrs), Traffic, Pu K. Laltluangliana, Dy. SP (Field], Traffic leh Inspector H.Laltanpuia, OC, Traffic ten thu an sawi bawk a ni.