‘Pradhan Mantri Awas Yojana (PMAY)-Housing for All (HFA) 2022 Mission’ chu nikum June 2015-a puanchhuah a nih atangin Mizoramah pawh hmalak nghal a ni a. UD&PA Department chuan DPR te siamin hmalakna hrang hrang a kalpui nasa tawh bawk a. He scheme hi awmze nei leh tha zawka a kal theih beiseiin state sorkar chuan kumin 7th June, 2016 khan District Screening Commitee chu a lo din tawh a. District Screening Commitee hian HFA hnuaia Beneficiary-Led Construction (BLC) leh Credit Linked Subsidy Scheme (CLSS) hnuaia insak tanpuina dawng turte scheme guidelines anga dawng tlak ngei an nih leh nih loh a enfiah thin dawn a.Vawiin khan Aizawl District Screening Committee on PMAY-HFA chu a vawi khatna atan NLUP Conference Hall-ah thukhawmin hlawhtling taka he scheme kalpui dan tur an sawiho.
Vawiin Screening Committee meeting hi UD&PA Director Pu Zorammuana-in a kaihruai a. Members kalte chu : Pu R.Romawia, MLA Aizawl N-I; Pu Vanlalzawma, MLA Aizawl W-3; Lt.Col.Zosangzuala, MLA Aizawl S-I; Pi Vanlalawmpuii Chawngthu, MLA & Chairperson, MWC; Pu PC Lalhmingthanga, Mayor, AMC; Pu HVL Zarzoenga, Jt. Director, UD&PA; Regional Manager, Mizoram, StBI; Chairman, Mizoram Rural Bank; Chairman, Mizoram Cooperative Apex Bank; Development Officer, HUDCO bakah Bank of India, Vijaya Bank, Canara Bank leh UCO Bank officials te an ni a. Meeting thurelah chuan PMAY-HFA dilna thehluhte chu endik leh finfiah (door-to-door verification) neih ni se, hemi atan hian Local Council leh NGOs te pun ni se tih a ni a. PMAY-HFA hnuaia mi harsa zawkte tan In sak tanpuina dil theih a ni tih mipui zingah hre lo an lo la tam avangin tun thla July 2016 chhung dil hun hi pawhsei sak turin meeting-ah hian an rel bawk.
PMAY-HFA hnuaia hmalakna te chu :
1. Beneficiary-Led Construction (BLC) : Insak tanpuina Rs.150000/- pek theihna a ni a. He insak tanpuina hi Mizoram chhunga town 23-ah te hawn a lo ni tawh a. Aizawl District-a Town 4 atanga dilna dawn zawng zawng hi 8031 a tling tawh a. Heng dilnate hi enfiah an nih hnuah dawng thei tur chin te thlanchhuah leh an ni ang a. Insak tanpuina dawng thei tehfung pawimawh takte chu a hnuaia tarlan ang hi a ni :
- India khua leh tui an ni tur a ni.
- Tuna an chenna khuaah hian kum 5 tal an cheng tawh tur a ni. Hei hi 1st january 2014 atanga chhiar let a ni ang.
- Economically Weaker Section (EWS) an ni tur a ni a, kum 1-a Rs.3 lakhs hnuai lam lalut te
- In sakna tur ram an nei ngei ngei tur a ni a, ram an neihna lehkha pawh hmuh theihin a awm ngei tur a ni bawk. - Tanpuina dawng turte hi anmahni puala chenna in neilo ngei an ni tur a ni.
- Chenna in awngrawp tawh ak, mahnia sa tha tura harsatna neite a huam thei ang.
- Programme dang hnuaia insak tanpuina dawng tawh ten an dawng nawn theilo ang.
- Heng mite duhsak bik an ni ang : Hmeithai, Pianphunga rualbanlo awmna chhungkua leh Senior Citizen
- In sak tur zau zawng hi
- 30 sq.m. carpet area a ni tur a ni.
2. Credit Linked Subsidy Scheme (CLSS) : hi housing loan a ni a. He housing loan hi Bank-te kaltlanga pek tur a ni ang. CLSS bik hi Central Sector Scheme a ni bawk. he scheme hnuai atang hian Housing Loan Interest Subsidy 6.5% chu Ministry of Housing & Urban Poverty Alleviation hian central Nodal Agency (NHB & HUDCO) te kaltlangin Bank hnenah a pe ang. Hemi bika state sorkar mawhphurhna chu Housing Loan diltute hian Housing Loan hi an mamawh ngei a ni tih enfiah leh Loan hmu tlak an ni tih lo certify hi a ni. Tun dinhmunah CLSS bik hi District Headquarter Towns-ah chiah hawn a ni hrih a, tun thlenga Aizawl Municipal Area atanga dilna dawn zat chu 1500 bawr vel a ni.
He component hnuaia loan dil thei chin chu :
1. EWS : Kum khata cheng nuai thum aia tlem lalut te. EWS tan 30 sq.m. aia te lo in sak nan nuai 6 thleng an dil thei ang.
2. Low Income Group (LIG) : Kum khata Rs.300000/- atanga Rs.600000 lalut te LIG tan 60 sq.m. aia te lo insak nan nuai 6 aia tam an dil thei ang a, amaherawhchu interest subsidy hi nuai 6 thleng tho an avail thei ang.
PMAY-HFA hnuaia BLC leh CLSS tanpuina dil duhte tan AMC Office emaw UD&PA Directorate-ah emaw office hun chhungin ngaihven theih a ni a, dil hun hi tun thla July 2016 chhung pawhsei leh a ni.
