Vawiin khan Aizawl West-III leh Aizawl South-I Constituency huam chhunga Presiding Officer leh 1st Polling Officer tura ruat ten I&PR Auditorium-ah training an nei.

Pu C.C Lalchhuangkima, Returning Officer chuan Presiding Officer leh Polling Officer-te chu an chanvo theuhvah mahni inrintawkna nena thawk turin leh thawhhona tha nei turin a fuih a. Election kalphungah hian thilthar awm reng a nih avangin an invawn reng a ngai a, Presiding Officer Handbook an chhiar ngun a ngai a ni a ti bawk. Training-ah hian Electronic Voting Machine (EVM) leh Voter Verified Paper Audit Trial (VVPAT) chungchang leh hman dan zirho niin, Presiding Officer leh Polling Officer-te chu an mawhphurhna hrang hrang hrilhhriat an ni.

Tarlan tawh angin VVPAT hi vote thlak tih chingpen theih lohna tura duan niin, voter-ten an vote thlakna kha a dik ngei a ni tih an chian thei dawn a. Vote thlaktuten an vote thlakna receipt, an candidate vote te hming leh serial number nen a chuanna VVPAT hmang hian an en thei dawn a ni. Vote chhiar nawn ngai awm palh ta se, VVPAT-a record hi a hman theih dawn bawk a ni.

VVPAT hi Noksen Assembly Bye-Election, Nagaland September 7, 2013-a neih ah khan hman a ni tawh a, General Election-ah chuan a vawi khatna atan Mizoram leh New Delhi hi hmanna tur a ni.

Training hi General Observer Pu Ramesh Misra chuan a hmanpui a ni.

Vawiin vek hian Assembly Constituency danga Presiding Officer leh 1st Polling Officer-te chu MZP Hall, Agriculture Conference Hall, Horticulture Conference Hall, Venghlui Central Hall, Khatla YMA Hall leh DLAO Conference Hall-ah te neih a ni bawk.