Vawiin chawhma khan Measles-Rubella Vaccination Campaign inbuatsaihna kal zelah Aizawl District Task Force on Immunization (DFTI) chu an chairman Aizawl DC Pi A. Muthamma hovin DC Conference Hall-ah an thukhawm.

Aizawl DC Pi A. Muthamma chuan inpuahchahna tha tak nena Measles-Rubella Vaccination Campaign chu kalpui a pawimawh thu a sawi a. Campaign hlawhtlin nan chuan department hrang hrang a bik takin Social Welfare Department leh School Education Department ten thawhhona tha an neih a ngai a ni, a ti a. Campaign chungchang  zirtirtute leh zirlaiten an hriat chian a tul thu a sawi bawk a ni.

District Immunization Officer, Dr. PC. Lalhmingliana chuan Measles-Rubella Vaccination kalpui dan tur  chungchang presentation a pe a. February Ni 27, 2018 khan Aizawl District Core Committee din a nih tawh thu a tarlang bawk.

Meeting-ah hian campaign atana micro plan siam chungchang te, school hrang hranga zirlai vaccine la thei tur zat te, sawrkar leh private school zirtirtu leh zirlaite campaign chungchanga hrilhhriat te, Primary Health Centre (PHC) leh Community Health centre (CHC)-a thawkte workshop neih dan bakah Measles-Rubella Vaccination Campaign atana tih tur chhawp chhuahte leh campaign kalpuinaa harsatna hrang hrang  an sawiho a ni.

Measles-Rubella Vaccination hi Mizoramah April Ni 16, 2018 atanga neih tan tur niin thla khat vel kalpui a ni dawn a. Nausen thla 9 atanga naupang kum 15 inkar a huam dawn a. District hrang hrang-a kalpui tur niin Mizoram chhunga naupang nuai 3 chuangin vaccine hi la thei tura ruahmanna siam a ni a. Heng nuai 3 chuanga 60% chu school naupang an ni. Aizawl District chhungah hian vaccine lakna tur block hrang hrang awmin hemi atana workshop pawh heng blockahte hian neih a lo ni tawh a ni.