Vawiin hian Serchhip Bawrhsap Pi Sangchhin Chinzah, Serchhip District Consultative Committee (DCC) Chairman ni bawk hovin a pisaah Serchhip District chhunga Bank hrang hrangten October – December, 2017 chhunga hna an thawh dan thlirletna hun DCC/DLRC/DLSC meeting neih a ni.

Chairman Pi Sangchhin Chinzah chuan, DCC Meeting hi thla thum danah khel lovin kan nei thin a, kan District chhunga Bank hrang hrangten danin min phut anga hma kan laknaah hmasawnna kan neih theih dan tur kan inhrilh hre thin. Amaherawh chu target kan neih te vawiin thlengin duhthusamin kan tlin thei lo fo mai chu rhaittheim a har a tih thu sawiin. Kuminah chuan nasa zawka kan beih a, kan target te kan tlin ngei a ngai a ni, a ti. Mirethei te tanpuina loan (priority lending) thilah DPR siamna man phutru thin thawktu an awm nia sawi awm thin chu a pawi a tih thu sawiin miretheite phena lo hlawk tumna rilru chu a thianghlim lo hle a a hriat thu a sawi bawk.

Report atanga a lan danin he mi hun (quarters) chhung hian Credit Deposit Ratio (CD Ratio) chu a hma aiin 1.16% in a sang hlek a 47.32% ah a chhova, amaherawh chu CD level ni ngei tura beisei chu 60% a ni thung. He hun chhunga District chhunga Bank zawng zawngte Deposit hmuh zat chu Rs. 23349.80 Lakh niin Advance an pek chu Rs. 11050.07 Lakh a ni. Bank mal ang chuan CD Ratio hi UBI in an ti tha ber a 78.86 niin SBI in 36.90 tlinin an tichhe ber a ni.

Annual Credit Plan hnuaia Priority sector ah 50.70% tlinin non-Priority ah 59.25% an tlin a, Priority hnuaiah hian Agriculture lam hmasawn nana Loan Rs. 1200 Lakh pechhuak tura beisei an nih laiin Rs. 509.15, Industry ah Rs. 600 Lakh beisei a nih laiin Rs. 375.37 leh Services ah Rs. 2690 beisei an nih laiin Rs. 1395 Lakh chauh an pe chhuak a. Non Priority ah Rs. 1680 pechhuak tura beisei an nih laiin Rs. 995.34 Lakh chauh an pechhuak thei bawk. Tin, ACP hnuaia Crop Loan hrim hrim pawh hi Rs. 700 Lakh pechhuak tura beisei an nih laiin Rs. 54.20 Lakh chauh an pe chhuak thei a ni. Priority Sector Advances ah hian MRB in an pe hnem bera tunah Rs. 4881.36 Lakh an pe a, UBI in pechhuak tlem berin Rs. 569.50 Lakh an pe thung. NPA Percentage hi a tlangpuiin 8-9 percent vel an ni hlawm.

Kisan Credit Card (KCC) Advance ah hian target nei ten an ti tha tlang a, PMEGP ah erawh target mi 73 a awm laiin mi 20 hnenah chauh an pechhuak thei thung. Margin Money pawh Rs. 155.50 Lakh lai nei chungin Rs. 29.88 Lakh chuah an la pechhuak thei rih a ni. PMEGP hi SBI in target 32 an neia, tumah an la pe thei lova, MRB in target 29 neiin mi 18 an pe tawh thung a, MCAB in target 16 neiin mi 2 a pe a, UBI in target 1 neiin a la pe lo thung.

Vawiina meeting hian Open Bank Branch/ Business Correspondent chu Lungpho khuaa SBI kaltlanga dah thar turin a rel a, SBI kaltlang vekin COrrespomdent Operating Agency kaltlanga Banking Outlet thar heng khaw panga Piler, Hualtu, Thentlang, Sialhau leh Hriangtlang ah neih thar nise tiin a rel bawk.

Heng te bakah hian thil pawimawh dang engemawzat a rel bawk a ni.

Meeting ah hian SP Pu Lalringdika te, Lead Bank Manager Pu R. Ralkhuma te, RBI Aizawl Branch Manager Pi Zinia Baruah te, District chhunga Bank hrang hrang Managers te leh PMEGP Nodal Officer, KVIC Pu  Laldula Sailo leh mi pawimawh dangte an tel a ni.