Vawiin hian Serchhip Bawrhsap Pi Sangchhin Chinzah hovin Serchhip District Immunisation Task Force te chuan kumin April ni 16 atanga neih tan tur Sentut leh Sentet (Meacles & Rubella) invenna vanccine naupang thla 9 atanga kum 15 inkarte hnena pek dan tur ngaihtuahin an thukhawm.

Chairman Pi Sangchhin Chinzah chuan, he vaccine hi a dawng/la tur naupang ten kim taka an lak ngei theih nan khawtina tlawmngaipawl leh kohhran te, khawtlang hotute chu thawhpuiah sawmin, an khua/veng theuha vaccine la turten an lak ngei theih nan thawktute lo tanpui turin a ngen a ni. Heng natna te hi thihna thlen thei natna, thihna em a thlen loh pawha thluak lam buaina hial thlen thei natna a nih avangin kokim taka kan lak a ngai a, mitinin kan ngaipawimawh tur a ni, a ti.

He hunah hian Dr. Lalhlunpuii, District Immunisation Officer chuan Sentut leh Sentet lam chi natna chanchin leh invenna tha taka kalpui a tul chhan sawi hmasain, India ramah Congenital Rubella Syndrome (CRS) kum 2020 a tihbo tuma hmalakna peng pawimawh ber a nih thu a sawi a. Vaccine pek beihpui thlak dan tur sawrkar ruahmanna tlangpui te a sawifiah nghalin he vaccine hi nausen thla 9 atanga kum 15 inkar zawng zawngte hnenah pek vek tur a ni.  April ni 16 atanga neih tana hapta 5 chhung neih chhunzawm tur a nih thu sawiin. A tir hapta hnih chhung chu school zawng zawngah vaccine pek a, a dawt hapta hnih dang chu Anganwadi leh School kal lo naupangte hnenah pek tur a nih thu sawiin, hapta tawp ber chu a la la ve lote zawn chhuahna haptaah hman tur a ni dawn a ni.

Meeting hian Education Department leh Social Welfare lam hotute nena thawh ho dan tur te, Ministry of Health & Family Welfare lamin Operational Guidelines an lo siam anga he vaccine pek hi kalpui a nih theih dan tur chi hrang hrangte rel a ni bawk.