Nimin khan DC Conference Hall, Mamit-ah  District Task Force on Immunization chu an Chairman leh District Bawrhsap ni bawk Pi Lalbiaksangi hovin an thukhawm.

Meeting-ah hian Intensified Mission Indradanush (IMI) 4th Round, Intensified Pulse Polio Immunization (IPPI)  1st Round, January thla chhunga kalpui leh  Measles Rubella (MR)  Vaccination Campaign thlirletna neih a ni a. Heng hridanna kalpuina kawnga hlawhtlinna te thlirho zui a ni. Intensified Mission Indradanush hnuaiah hian nikum October 2017 atanga January 2018 chhunga naupang hridanna pek te chu target 365 ah 415 pek an ni a, chu chu za zelah  113.69% a ni. Intensified Pulse Polio Immunization Programme (IPPI) ah hian target 9861 ah 9918 niin chu chu za zelah 100.6% niin a  hlawhtlinna hmuh a nih thu meeting-ah hian tarlan a ni.

Meeting vekah hian Measles Rubella (MR) Campaign preview neih niin Dr Lalhlimpuii Consultant WHO, chuan Measles Rubella natna chungchang leh Mamit District chhunga hridanna pek hna kalpui dan tur chungchangah zirtirna a lem nen a nei a, Mamit District chhungah  April 16 hian naupang thla kua atanga kum 15 inkar te  hnenah he hridanna hi pek vek tura ruahmanna kalpui a ni a, he hridanna la te hnenah hian Immunization Certificate pek vek an ni ang. Measles Rubella hi sentut chi khat niin nu in naupai laia,  a vei chuan naute piansualna a thlen thei a, khawvel pum huap ah kumkhatah mi nuaikhatin an vei thin tih hmuhchhuah a ni, chung zinga 40% chu India rama naupangte an nih avangin Mizoramah pawh he invenna hi tha taka kalpui tum a ni. 

Meeting-ah hian kan District chhunga hridanna lak kawngah amamawh tuten tha taka an lak theihna turin khawtlang hruaitute chu uar lehzuala mipui te rilru hmin tura tan la thar turin leh mipui te pawh he hridanna hi a hlauhawm lohzia  hre thar turin meeting hian a ngen bawk a ni. 

Meeting-ah hian District Task Force On Immunization member te an tel tha hle a ni.