591/2025-2026

AIZAWL; the 27^th May, 2025: Vawiin chawhma khan Aizawl District huam chhunga kangmei laka an khaw ramngaw humhalh tha khuate thlangtu tur committee (Selection Committee for the Village Level Fire Prevention Award) chuan Pu Lalnunsanga Khawlhring, Convener, Selection Committee leh DFO, Aizawl Forest Division ni bawk Office chamber-ah meeting an nei a, meeting hi amah Convener & DFO chuan a  kaihruai nghal a ni.

Meeting-ah hian Aizawl district huamchhunga Forest Range Officer-te hnen atangin an Range huam chhunga kangmei ven kawnga thawk tha khuate hmalakna hrang hrang leh a finfiahna( Evidence) te nen report an pe a. Meeting chuan tehfung hrang hranga hmanga a teh hnuah Village Level Fire Prevention Award dawngtu tur khua pathum, Aizawl Forest Division atangin khua pakhat leh Darlawn Forest Division atangin khua pahnih an thlangchhuak ta a ni.

Lawmman dawngtu tur khuate hi tahrik ni 11 June, 2025-a Green Mizoram Day pual function-ah mipui hriata puanchhuah a, lawmman pek nghal an ni ang.