Vawiin khan Aizawl East II cluster-a veng 7 hnenah Industries department hnuaia trade 20 a NLUP tanpuina 2nd installment sem a ni a. Bialtu MLA, Pu Lalsawta, Education Minister-in Local Council hruaitute kutah a hlan a ni.

Pu Lalsawta chuan NLUP dawngtute fuihna thu sawiin Chief Minister Pu Lal Thanhawla kaihhruai Congress party chuan sorkarna an chelh chuan mirethei te chhanchhuah hna an ngai pawimawh ber ang tiin mipui hnenah an intiam a. An thutiam ti hlawhtling turin theihtawpin tan an la a. Mipui beiseina chhangin tunah hian mirethei ten eizawnna bul an tanna tur sum sem theih a lo ni ta a ni, a ti a. Khawpui chhunga cheng mirethei ram neilo te tan sorkar-in Industry hnuaiah trade hrang hrang a hma lakna tur sum tam tak ruahman a ni a. Heti zozai sum hi a lo thlawnin a luangral tur a ni lo, a ti a. Sorkar thil tum ti hlawhtling turin Aizawl East II bial chu hmaruaitu ni turin a chah a. Tanpuina dawngtu te chuan din chhuah pui nan an hman phawt chuan sorkar a chhiah luang lut a lo pung ang a, mi tam zawk tan eizawnna hna siamtu, ram leh hnam tan malsawmna thlentu an ni dawn a ni, a ti a. NLUP tanpuina dawngtu ten an hlawhtlin pui ngei theih nan tih tak meuhva Pathian hnena dilsak chu kohhran leh khawtlang pawhin an tih tur a ni, tiin Pu Sawta chuan amah ngei pawhin a dilsak reng dawn tih a sawi a. NLUP tanpuina dawngtute chu a nihna tur dik takah an sum hmang a, hlawhtlin pui ngei turin duhsakna a hlan a ni.

Inkhawm kaihruaitu Pu R.Selthuama, NLUP Implementing Board Chairman chuan NLUP tanpuina cheque hmanga sem chuan eirukna a veng a ni, tiin a dawngtute chuan kawng 2 thlan tur an nei, a ti a. NLUP chu malsawmna leh anchhia ah chan tir theih a nih avangin an kawng thlan tur chu anmahni duhthlanna ah a innghat a ni, a ti bawk. District Level Monitoring Chairman Lt.Col.Z.S.Zuala pawhin fuihna thu sawiin District level bakah Village level Monitoring Committee ten line department te nen thawk hovin NLUP dawngtu te hmalakna hi an endik reng dawn tih a sawi a. A tul angin counselling pawh neih thin a nih tur thu a tarlang a ni.

Aizawl East II cluster-ah hian Tuithiang atangin chhungkaw 34, Armed Veng South ah chhungkaw 62, Chite-ah 6, Chhinga Veng ah 110, Saron Vengah 25, Armed Veng ah 41, Dawrpui ah 37, an vaiin chhungkaw 315 hnenah Rs.1,52,74,100/- sem a ni. Industries department hnuaiah hian a tira beneficiary awm zat 3200 atangin 10700 ah an pun chhoh tak avangin hei hian 1st leh 2nd installment pek a ti khawtlai a. Khawpui chhunga NLUP tanpuina dawngtu tam ber chuan tha taka hma an lak laiin Aizawl West III bial ah beneficiary zinga chhungkaw 8 chu hma an lak that loh avangin an sum dawn tur hrensak an ni. Vawiina NLUP sem inkhawmah hian Pu Lungmuana Functional Manager, DIC Aizawl in technical report a pe a. Addl. D.C Pu J.Hmingthanmawia’n lawmthu sawiin hun hnung a khar a ni.