1107/2022-2023
Aizawl the 30th June, 2022 : Vawiin khan Aizawl East-II MLA bial chhunga kumin 2022-a HSLC leh HSSLC pass thar mi 468 te hnenah lawmpuina thilpek Pu Robert Romawia Royte, Aizawl East-II bialtu MLA, Minister ni bawkin a chenna In, Chhinga Vengah a hlan.

Pu Robert Romawia Royte, Sport Minister chuan thu sawiin kuminah a bial chhunga HSLC leh HSSLC pass thar mi 468te chu anmahni mimal theuh leh an chhungte a lawmpui tak zet thu a sawi a. Kumina pass ve ta lote a tuarpui a, tih leha tha taka bei leh turin a fuih bawk a ni. Aizawl E-II bialtu Sports Minister chuan zirna hi mimal leh chhungkua hmasawnna leh changkanna bul ber a nih avangin a ngai pawimawh ber a ni a ti. Mizo thalaite zingah ruihhlo a hluar mek chu mimal, chhungkua leh kohhran pawhin an do nasat lehzual a tul tiin sorkar, YMA leh pawl hrang hrang ten harsatna tam tak kara ruihhlo an do hi an fakawm a, mipui pawhin an tawiawm zel a tul a ni a ti.

Aizawl East-II bial chhungah hian Veng pasasarih - Dawrpui, Chhinga Veng, Saron Veng, Tuithiang Veng, Armed Veng,Armed Veng South leh Chite Vengte awmin, heng Veng 7 atang hian HSLC pass thar mi 267 leh HSSLC pass thar mi 201 an awm a. Heng pass thar mi 468 te hi lawmpuina pek vek an ni. HSSLC-ah hian rampum huapa a titha 10 (Top 10) zingah Malsawmdawngzeli, Armed Veng, Science stream-a 4-na leh Vanlaldinpuii, Chhinga Veng, Science stream-a 5-na te hnenah lawmpuina Laptop, Citation leh tangkafai Rs 5,000/- hlan an ni a. Samuel Lalhruaitluanga, Chhinga Veng, Geology subject-a mark hmu sang ber leh Vanlaldinpuii, Chhinga Veng, Computer Science-a mark hmu sang berte hnenah lawmpuina Smartphone leh tangkafai Rs. 5,000/- ve ve hlan an ni bawk. Aizawl E-II bial chhunga Distinction-a pass zirlai 97 te hnenah lawmpuina Rs. 5,000/- leh Holy Bible hlan theuh an ni a. HSLC leh HSSLC zirlai hlawhtling dang mi 371 te hnenah Holy Bible an aiawh kalte kutah pek chhuah a ni bawk. Veng tina sem chhuaktu tur thlan bikte hnenah heng lawmpuinate hi pek chhuah a ni.

Sport Minister Pu Robert Romawia Royte hian zirna a ngaih pawimawh avangin Minister a nih tirh kum 2019 atang khan a bial chhunga HSLC & HSSLC pass tharte hnenah kum tin lawmpuina a pe thin a ni. Vawiina pass tharte lawmna inkhawm hi Pu Lalramthianghlima, DEO, Aizawl District-in a kaihruai a, Rev. P.B.Mankima, Chhinga Veng Bialtu Pastor-in hunserh hmangin Pu H.Zothansanga, Sport Minister P.S-in report tawi a pe a ni.

Attachment

  • Loading attachment...