1108/2022-2023

Kolasib dated 30th June 2022: Vawiin chhun khan Parish Hall, Venglai Kolasibah DC Office buatsaihin ‘Remna ni 2022’ lawmna hun hman a ni a. Dr.R.Lalthangliana, Minister, Health & Family Welfare Department chu Khuallian niin Kolasib District Office hrang hrang hotute, NGO leh khawtlang hruaitute leh Ex-MNA ten he hun hi an telpui a ni.

Khuallian Dr.R.Lalthangliana chuan hrileng leh harsatna hrang hrang karah Kolasib district-in hmasawnna hmel thar a hmu zel chu lawmawm a tih thu sawiin Kolasib district chhunga Sub-Centre leh PHC awm ang angte changtlung zawk a thawmtha turin Health & Wellness Centre-a hlan kai vek a nih thu a sawi. Kolasib district chu district dangte ang lo takin state thenawmte nen a ramri awmna leh zin mite luhchhuahna hmunpui a nih angin mihring hriselna enkawl kawng ah Health Department hmunhma te pawh thawmthat zel tum a nih thu tarlangin NESIDS atangin khum 100 awm theihna District Hospital sakna tur peihfel thuai beisei a nih thu leh kal natna nei enkawlna turin Dialysis tih theihna changtlung zawk siamna tur pawh ruahman mek a nih thu a sawi.

Health Minister chuan Sawrkar department, NGO leh mipui thawhhona a that em avangin hrileng do kawngah pawh Mizoram chu hrikai zat atanga chhut a boral zat tlem berna State kan nih thu a tarlang a,  Registrar General and Census Commissioner of India-in zirchianna a tihchhuah hnuhnung berah Mizoram chu naupiang kum 1 hnuai lam thih tlemna ber State kan nih mek thu a sawi bawk a ni.


Ralmuanna leh zalenna awm lohna ah ramin hma a sawn theih loh thu Dr.R.Lalthangliana chuan sawiin tun a hmasawnna hmel thar kan hmuh mekte hi  ram leh hnam tan a nunna thap a ke lo pen chhuaktute vang a nih thu a sawi a. Ram changkang leh hmasawn apiangah ram tan a martarte an zahthiamin ram leh hnam ziarang chawisanna a nasat țhin thu a sawi. Mizo Nationalism bulțantu leh zalenna kan hmuh theih nana sulsutu Pu Laldenga kaihhruaina hnuai a MNF hnam pasațhate hmalak dan hrang hrangte Health Minister chuan sawiin nunna tam tak leh harsatna hrang hrang paltlang hnua sual chhuah 'Remna' hi hlut thiam a țhangthar zawkte pawh hmasawnna tihlawhtling tu nih tum zelin, hmasawnna rualkhai leh intluktlanna ram a nih theih nana thawktu ni țheuh turin kalkhawmte a chah a ni.

‘Remna ni 2022’ lawmna hun Kolasiba neih hi Pu John LT Sanga, Deputy Commissioner-in a kaihruai a, Hmar Veng thalai pawl leh Diakkawn Group Zaipawlten hla an rem a. Remna sual chhuah anih dan tarlanna Video tawi enho niin Pu Lallawmawma, Addl. DC in lawmthu sawina hun a hmang bawk a ni.

Attachment

  • Loading attachment...