1109/2022-2023
Mizoram remna leh muanna champha Remna Ni 2022 chu vawiin khan Community Hall, Electric Veng, Hnahthialah hman niin High Powered Committee Lunglei Vice Chairman Pu Lawmawma Tochhawng, MLA chuan khuallian niin a hmanpui a, "Remna leh muanna hi Pathian min pek a ni a, kan neih theihna turin a hmanrua atan Kohhran, NGO, Political party te a hmang a ni" a ti.

Khuallian Pu Lawmawma Tochhawng chuan Remna leh muanna hian Zofate hi khawvel hriat khawpin a pho chhuak tih sawiin "hmasawnna kawng hrang hrang inkalpawhna te, zirnaah te leh kan thlarau nunah te a thlen a ni" a ti. Tuna remna leh muanna hi Zofate tan kan tawpna tur ala ni lo tih pawh sawiin "Inpui kan la thleng lova, zofate zalenna pumhlum kan neihna turin hmanraw tangkaiah i hmang ang u" a ti a, Remna leh muanna thuthlung kan neih chu duhthusam loh lai a awm pawhin ti phuisui a, hmang tangkai tur leh mahni hmazawn theuhah vawng nung tlat turin kalkhawmte a chah a ni

Remna leh muanna hi Pathian min pek a nih angin zau zawka chanchin tha puan darhna hmanraw tha leh tangkai takah hman a duh thu HPC Lunglei Vice Chairman Pu Lawmawma Tochhawng MLA chuan a sawi bakah Hnahthial District tih changtlun leh hmasawnna hrang hrang a tarlang bawk a ni

Hnahthial-a remna Ni 2022 lawmna inkhawm hi Govt HSS Hnahthial Class XII zirlai ten "Ro min rel sak ang che" ti hla hmangin hawnna hun an hmang a, Major Remruatzauva, CO Hnahthial chuan Pathian hnena inhlanna hunserh hmangin District bawrhsap Pu R.Lalremsanga chuan kalkhawmte lawmna thu sawi a, MHIP Sub-Hqrs Hnahthial chuan Pangpar lam entirin Pu R.Rochhunga, Vice President, YMA Sub-Hqrs Hnahthial chuan thu a sawi bakah zaithiam ten kalkhawmte zaiin an awi a, Superintendent of Police Pu Lalbiakkila chuan lawmthu sawiin Hnahthial-a Remna Ni 2022 inkhawm hi a khar a ni.