No.728/2020-2021

Vawiin atang hian Aizawl East-II bial chhunga Bialtu MLA in a MLA Fund hmanga puanthui khawl 200 a sem dawngtute chuan tunlaia mipui mamawh tak Hmaituamna thui hnatlang an nei a.Vawiin hian Aizawl DC in phalna a pek angin mi 50 in an thui a ni.

He hnatlanna hmun Govt KVM High School hi Aizawl East-II Bialtu MLA leh Sports Minister Pu Robert Romawia Royte pawhin tlawhin tlawmngaia puanthui tura hnatlangte chungah lawmthu a hrilh a,midangte tana malsawmna nih duhna thinlung an neih avangin mamawhtu tamtakin an zar an zo dawn a ni a ti.

Minister chuan MLA Fund hmanga puanthui khawl 200 a mamawhtute hnena a sem chuan nasa takin a dawngtute leh an thenawmte tan pawh hlawkna a thlen nghal tih ka hmu a,hmaituamna pawh a thuichhuak tam hman tawh viau a ni a ti a.Covid19 hripui avanga Lockdown a ziaawm hret hret hian Hmaituamna mamawhna a tisang zual zel a ni a ti a,a tam thei angber thuichhuah a tul thu a sawi.

Pu Roberta chuan puanthui khawl sem chu hmaituamna thuinan ringawta tih nilovin Aizawl East-II biala mi tam takin chhungkaw mamawhna hrang hranga hman tangkai zui zel tur anih bakah eizawnna leh sum lakluhna atana hman theih a nih beiseina rilru a tih a nih thu a sawi.

He hnatlangah hian hmaituamna zaitu mi 4 leh a thuitu mi 50 zette an hnatlang a,an vaiin hmeichhia vek an ni.Puanthui khawl dawngtute hi an bialtu MLA Pu Robert Romawia Royte in an mamawhna hriaa puanthui khawl a pek avangin an lawm hle a,mipui tan an theih ang anga a tul dan anga chetcbhuah ve zel an tum thu an sawi.

He hnatlang tannan hian Maj Dr ST Dula kaihhruainain devotion hun tawi neih a ni a,tawngtai rualna neih anih zawhah hna hi tan a ni.Vawiin ang tho hian naktuk ni 2/4/2020 ah pawh mi 50 in hnatlangin hmaituamna an thui zui leh ang.