Ni thum awh tur Aizawl Handloom Fair chu vawiin khan Industries Minister Pu H.Rohluna’n Assembly Annexe building-ah a hawng.
Pu H.Rohluna chuan handloom hi Mizo zingah bul kan tanna a rei tawh ang aiin hlawhtlin hmaa bansan ta an tam a, teirei peihte tan erawh eizawnna hlawk leh hlawhtling tak an chharchhuak a ni, a ti a. Rilru hmanhmawh luat vang leh vawilehkhata hlawk thut thil a nih loh avanga nih tur ang ni phalo an awm fo avangin infuih a tul hle a ni, a ti. Minister chuan Mizo puan tahtute thawh rah mawi tak tak an phochhuak chu lawmawm a tih thusawiin tun hma lamah kha chuan Manipur puantah thiamte puan kan lei thin a, tunah erawh kan State thenawmah kan thawn chhuak veleh ta thung hi hlawhtlinna ropui tak a ni, a ti a. Hlawhtling tawh ten midang bul tan ve turte tanpui duhna leh khaichhuah zel duhna thinlung pu turin a fuih a ni.
Industries Minister chuan sawrkar hmalakna thenkhat zingah Cluster Development Project chungchang sawilangin hei hi Sawleng leh Thenzawl-ah tan a ni tawh, a ti a. Sawrkar laipui atangin a thawhkhatnaah sum cheng nuai zathum chuang hmuh a ni, a ti. Skill Development training kalpui mek a ni a, Weaver Service Centre (WSC) hawn takah pawh puantahtute tanpui turin mithiamte’n an awm chilh reng a ni, a ti bawk. Luangmuala Industrial Growth Centre-ah Apparel and Garment Production Centre building sak mek niin hawn theih thuai beisei a ni, a ti a. Puantahtute fuihin Pu H.Rohluna chuan an kutchhuak reng rengin belhchian dawl se la, mite duhzawng ngaihvenin a leitute lungawina khawpa rintlak leh thaa an siam phawt chuan market-ah buaina an nei lovang, a ti.
Parliamentary Secretary Pu Joseph Lalhimpuia pawhin thusawiin Mizo kutchhuak puante chu khawvel ramdangah pawh mawi an ti a, amaherawhchu dan anga neitu nihna dik tak hi Mizoten kan lo la neih loh avangin Intellectual Property Rights hnuaiah Mizo puan chu Mizoten neitu nihna kan neih ngei theih nan chak taka hmalak mek a ni, a ti.
Hawnna inkhawm hi Mizoram Apex Handloom & Handicraft Cooperative Society Ltd. (MAHCO) Chairman Pu Zohmangaiha’n a kaihruai a. Cooperation Secretary Pu Jack L. Darkim pawhin a telpui a ni.
