Vawiin khan Pu C.Ngunlianchunga, Minister, DM&R hovin a office chamber-ah Aizawl Hunthar Venga lei tlahniam chungchanga sawrkar hmalak mekna leh hmachhawp te thlirhona leh sawihona hun hman a ni.

He meeting pawimawh takah hian Pu P.C Ramdinthara, Managing Director, AIE Construction in Hunthar Venga lei tlahniam Detailed Project Report (DPR) an buatsaih power point presentation pe in chipchiar takin a sawifiah a, a sawifiahnaah hian he project atana pawimawh tak Soil Investigation Report peih a la nih loh avangin DPR hi final theih a nih loh thu a tarlang bawk a ni. He hunah hian thil hriatfiah loh sawifiahna hun hman a ni bawk.

DM&R Department hian Hunthar lei tlahniam chungchangah hian theihtawpin hma a la reng a, hei hi project lian tak anih avangin leh Geological Survey of India mithiam ten reports an peih ve leh chak taka hmalak a nih tur thu meeting ah hian tarlan a ni bawk.

Hunthar lei tlahniam hian kawng tam takah zoram mipuite harsatna a thlen thin a, kawng engkima kan chak lak na kawng pawimawh tak a nih avangin, sawrkarin he lai hmun siamthat na tura hma a lakna tur kawngah mipuiten harsatna siam lo hram turin a ngen a ni.

He hunah hian Pu Zothankhuma, IAS, Secretary, DM&R, Pu C.Lalpeksanga, Director, DM&R te, I&PR Department atang te, MJA hruaitute, Hunthar Veng Local Council hruaitute, YMA hruaitute leh officials engemawzat an tel a ni.