Mizoram a Art tihhmasawnna tur programme pawimawh tak ‘Difference Screen’ chu vawiin khan Art Novelty Gallery, Chaltlang ah neih a ni a. England atangin Art lama mithiam Bruce Alan, Artspace Bristol leh Bristol Sculpture Lead dintu chuan he hun hi a hmanpui a ni.

Art Novelty neitu, Pi Lalhmingmawii chuan programme bautsaih chhan te sawiin Mizo thalai zingah art lama tuina lo pung chho mekah kawng sialtu ni tura hma hrang hrang an lak dante a sawi a. Lemziak leh lem ker sculpture ti hmasawn tura sawrkar inhawnna leh Nodal Department, Information & Public Relations Department chungah lawmthu a sawi a ni.

Pu Bruce Alana chuan film hmanga Art tih hmasawnna chungchang leh Art leh film inkungkaihna chungchang a zirtir a, tun tumah hian Arts Council of England tirhin Mizoramah he programme hi rawn hmang a ni. Mizoram University zirlaite leh high School atanga zirlai he huna telte chuan hlawkthlak an ti hle a, khawvel huapa mithiamin zoram a rawn thleng thei chu vannei an inti hle a ni.

Bruce Alan hi Dr. Raj Kumar Majumdar, Assam University leh Uttam Ghosh, Art Teacher, Silchar ten an tawiawm a ni.