Mizoram Middle School Hindi Teachers’ Association General Conference vawi 9-na chu vawiin khan Synod Conference Centre ah neih a ni a, Environment, Forest & Climate Change Minister Pu Lalrinmawia Ralte in a hmanpui.
Khuallian Pu Lalrinmawia Ralte chuan thu sawiin Mizote te tan India rama tlangnel tur leh neitu chan chang tur chuan Hindi ziak leh chhiar thiam mai bakah tawng thiam a pawimawh a ni a ti. India ram chu hnam hrang hrang leh sakhaw hrang hrang chen ho na ni mahse Hindi chu tawng tualleng ber a nih avangin Hindi tawng thiamlo tan chuan kawng tam takah harsatna a awm theih thu a sawi bawk. Mizoram chu Hmar-Chhak ah pawh Hindi thiamlo ber pawl kan nih thu Minister chuan tarlangin chumi avang chuan India ram hmun hrang hrangah Mizote kan tlangnel loh phah a ni a ti. Degree nei tam tak zingah pawh inbiangbiakna kawnga harsatna nei (low communication skills) an awm thu sawiin, chu chuan hna zawnna kawngah thalai tamtak zingah harsatna a thlen phah a ni a ti. Skill Development Scheme hnuaia phai lama Mizo thalai hna hmu tam zawk pawh Hindi tawng thiam an nih thu a tarlang a, chu chuan Hindi thiam pawimawhna a tarlang a ni a ti. Sawrkar Project leh hmasawnna chi hrang hrangin Mizoram a rawn tuam meka, leilung fate ina hamthatna dawng tur leh hnamdang laka chimral kan nih lohna tur chuan mahni tawng leh culture lo humhalh bakah India ram tawng tualleng Hindi tawng thiam-a lo inralrin ve a ngai a ni a ti bawk.
Minister chuan Hindi Zirtirtu kalkhawm te chu fuihin Mizo naupangte chu ziak leh chhiar thiamah chauh ni lovin mahni insawikuak theihna tur khawpa Hindi tawng an thiam theih nan zirna run-a tan la zual sauh turin a chah. Chumi kawngah chuan Mizoram Sawrkar pawh in nasa taka tan la in, Spoken Hindi Class buatsaih a tum thu a sawi a. Hindi Teachers te hlawh lak chungchanga harsatna lian tak an tawh thin chu Sawrkar chuan pawi tiin Chief Minister Pu Lalthanhawla leh Education Minister Pu Rohluna te pawhin Prime Minister hnenah lehkha te thawna theihtawp chhuaha hma an lakpui mek thu te a hrilhfiah bawk.
General Conference hi Pu Zonunmawia, President, Mizoram Middle School Hindi Teachers’ Association-in a kaihruai a, member mual liamta 7 te sunna hun hman ani a, chawhnu lamah General Headquarters leh Sub-Headquarters Agenda hrang hrang sawiho a ni bawk.
