DIRECTORATE OF INFORMATION & PUBLIC RELATIONS, Government of Mizoram, India

4318/2024-2025

Aizawl, the 18^th February 2025 : Vawiin khan Sports & Youth Services Department leh Innovations India Pvt. Ltd. chuan Directorate of Sports & Youth Services, MINECO ah Aizawl International Half Marathon buatsaih a nih thei nan thawhhona dan inremna an ziak a. He programme tawite hi Sports Minister Pu Lalnghinglova Hmar in a telpui a. Sports & Youth Services Department aiawhin Secretary, Sports & Youth Services Pu Lalramsanga Sailo leh Innovations India Pvt. Ltd. aiawhin Capt. Rahul Bali ten inremna agreement ah hming an ziak a ni.

Pu Lalnghinglova Hmar chuan Half Marathon intlansiak hi khawvel in a buaipui nasa in, a lar chho mek dante sawiin India Marathon Map ah Mizoram hi kan lang a hun ve tawh hle a ni, a ti a. Infiamna tihhmasawn zel kawngah te, hriselna leh tawksa insawizawi fitness tih lar leh uar zel nan te, khualzin hip belh nan te leh ruihlo dona kawnga te Mizoramin a tangkai theih thu a tarlang a. Khawvel leh ram pum huap marathon tlan thin runner tha an rawn telh thei nan he Half Marathon hi Athletics Federation of India (AFI) hriatpuina leh an Calendar ah telh anih thei nan hma lak tum a nih thu te a sawi lang bawk a ni.

Aizawl International Half Marathon buatsaih nana sum tul chu Innovations India in sponsorship kal tlangin an dap dawn a, sum tlema zawng chu Sports & Youth Services Department in a tum bawk dawn a. Half Marathon intlansiak hi kilometre 21.1 thui tur a ni a, an tlan na kawng pawh la thlan tur a ni. Half Marathon bakah kum 5, km 10 tlan te pawh bilh telh tum a ni. A tel tum te (naupang tan bak) chu man chawi inziahluh a ngai dawn a ni.

Inremna ziah zawha helai hmun ah Press Meet neih nghal niin zawhna awm te chu Mizoram Athletics Association hruaitu Pu Lalduhkima leh Innovations India ten an chang a ni a

Attachment