4197/2023-2024
Aizawl, the 16th March 2024: Pu. B. Lalchhanzova Land Revenue & Settlement Minister chuan tukin zingkarah khan Bawngklawn Brigade Pig Producers Cooperative Society ten eizawnna tura ram an bawh mek Brigade Field mawng lam ami chu a tlawh a. Society member 23 ten an lo dawngsawng a, hmalak ho dan tur te an sawiho. Helai ram hi Land Lease pe in kalpui tum a ni a, Municipal dan siam bawhchhe lo thei ang ber tura kalpui tum a ni dawn a ni.
Pu B. Lalchhanzova chuan Aizawl khawpuia cheng mi tam tak te hian eizawnna hrang hrang kalpui turin ram kan neilo a, ran vulh te, huan siam te, puantah te leh a dangte kalpui turin ram awl hman tur avang hle a, hetiang harsatna sukiang tur hian Urban Livelihood Multipurpose Camp (ULMIC) ruahman turin Land Revenue & Settlement Department chuan ngaihtuahna a seng mek a, a puitlin ngei ka beisei a ti.
Aizawl khawpuia cheng eizawnna tur ram nei si lo ten an mamawh dan anga an hman hawh theih tur ram awl la awm te zawn ani anga, ram awl nei midangte eizawnna atana hawhtir phalte pawh thawhpui ah sawm an ni anga, chutiang ULMIC hmun chu sawrkarin thumrawn (Convergence) hmangin kawngte, electric te, tui te leh ṭul dangte a ruahman anga, eizawnna mamawh ten inhnangfak nan ṭangkai takin an hmang thei dawn a ni a ti bawk.
ULMIC hi mimal ta tur ni lovin, zau tinah society din zel ani anga, eizawnna mamawh ten society kaltlangin an hmang ṭangkai thei dawn a ni.
Hetiang camp din tur hian department mal anga kalpui theih ani dawn lova, department hrang hrangte, Municipality te, Local Council te, Kohhran leh YMA leh adangte thawhhona tur a ni dawn a. Eizawng duhten awlsam zawka an eizawnna an kalpui theihnan zau tin mamawh te sawrkar chuan a theih anga angin a ngaihtuahpui dawn ani.
Minister chuan, ULMIC hi thalai zingah pawh vawkvulh, ar vulh leh eizawna dang kalpui duh te tan hman ṭangkai theih ani anga, ruihhloa harsatna tawkte tan nunkawng dik zawhna atan pawh a ṭangkai theih a beiseiawm hle ani a ti. Sawrkar department hrang leh midang ṭanpuina kawnga luangchhuak thin mimal leh company te tan pawh kawnghmang nei zawka midang ṭanpui theihna tur ani dawn a, he ULMIC hmalakna hi Israel ram dinchhuahna atana model pawimawh tak kum 1910 a bul an lo ṭan Kibbutz-Farming community kalphung nen pawh a inzul thei ang a ti.
