170/2025-2026

Aizawl dated 15th April 2025: Vawiin chawhma khan Secretariat Conference Hall, MINECO-ah Aizawl khawpui chhung kawng thawmthat zelna tur a ruahmanna leh hmachhawpte sawi hovin Coordination Meeting chuan thutkhawmna an nei a. PWD Minister Pu Vanlalhlana’n thutkhawm hi a kaihruai a ni.

PWD Minister Pu Vanlalhlana chuan kawng chu mi zawng zawng intawm a nih angin a enkawl leh dimdawi kawngah pawh mi tinin mawhphurhna kan neih thu a sawi a. Kawng tha leh tlo nei tur chuan a nihna tur ang tak a kawng siam a pawimawh bak ah kawngpui behchhan a hna kalpui ngai thin department-te nen thawhho a pawimawh thu a sawi. 

Thutkhawmna ah hian PHE Department, P&E Department, Aizawl DC, Superintendent of Police (Traffic), UD&PA Department, Transport Department, Aizawl Municipal Corporation, SIPMIU, Aizawl Smart City Limited bakah Central Young Mizo Association leh Aizawl City Local Council Association aiawh te an tel a. Kawng tha leh tlo nei tur a thil pawimawh hrang hrang leh harsatna awm thei sutkian dan turte sawi ho a ni.

Aizawl khawpui chhung kawng thawmthat hna hi thuang hnih a kalpui tur niin Aizawl Road North Division hnuai ah Km 44-a thui leh Aizawl Road South Division hnuai ah km 40-a thui thawmthat tur a ni tih a ni a. Aizawl khawpui chhung kawngpui tam zawk hi Bituminous Concrete (BC) hmang a thawmthat tum niin Thuampui leh Selesih kawng bik ah hi chuan Rigid pavement-a siam that tum a nih thu thutkhawm ah hian tarlan a ni.

M/s Nidhi Creative Infrastructure Ltd.-ten Engineering, Procurement and Construction (EPC) Mode in thla 18 chhung an thawk ang a. Bituminous Concrete atan a hamn tur bungrua hi Cachar leh Rawpuichhip atang a lak tum a ni. Zanin atang hian a thawh khatna atan Bawngkawn - Chanmari inkar kawng thawmthat hna hi thawh tan tum a ni.