171/2025-2026

Dated Serchhip, the 14th April, 2025: Vawiin khan Serchhip District Disaster Management Authority (DDMA) te chu an Chairman Pu Paul L Khuma, Serchhip DC hoin Serchhip DC meeting Hall ah an thukhawm a.  He hunah hian DDMA member te bakah department leh tlawmngai pawl hrang hrang te, chhiatna a thlen thulha mawhphurhna pawimawh chelhtu tur te ko kim takin an tel a ni.

Kan hma lawkah furpui a lo thlen dawn avangin inbuatsaihna tha taka kalpui a, khuarel chhiatna a lo thlena hmachhawn dan tur ruahmanna kim chang tak siam a tul tih sawiin DC chuan a sawi a. Vawiin meeting-a member tel zawng zawng ten an rilru leh ngaihtuahna seng a, rawtna felfai tak nei theuh turin a sawm a ni. 

Chhiatna a thlenin Department tin te, khawtlang hruaitu VC te leh tlawmngai pawl te thawhhona tha a pawimawh a, khawi hmunah pawh chhiatna thleng se mahni mawhphurhna leh tih tur tlanchhiatsan loa theihtawp chhuah theuh a tul thu meeting-ah hian sawilan a ni a. Chhiatna thlen tamna hmun disaster prone area ah te tang tlang a, a tul chuan hnatlang anga thawhchhuah a, department te pawh bang bik loa tlawmngai pawl te nen thawk hoin rang taka bawhzui zel ni se an ti a. A bik takin tui luan kawr leiin a hnawhpin avanga chhiatna thleng a tam thin avangin rang taka then nghal thin ni se, tiin meeting hian an rel a ni. 

Tun lai thiamna hmang tangkaiin Incident Response System (IRS) group chu whatsapp kaltlanga siam a nih thu leh, Serchhip District khawi  hmunah pawh thleng se, thuneituten rang taka an hriat theihnan hriattirna post nghal zel ni se, tiin an rel a. Lo neitute thlai tihchhiat crop damage chungchangah zangnadawmna DC ah leh deparment ah a kawpa dilna a luh thin avangin DC Office a dilna lut reng reng Department-ah hlan chhawngin a dik ngei em tih finfiah ni se tiin an rel a ni. Chhiatna a thlena tih leh tih loh tur (dos and donts) te chu deparment ten an neih ang apiang DC Office ah thehlutin mipui ten an tangkaipui theihna turin thehdarh a ni dawn bawk a ni. 

Chhiatna a thlenin mipuiin rang taka thuneitute an biak pawh theihna tur cell phone no. 8119978919 leh landline number 1077 te hi englai pawha biak theih reng an ni a. Serchhip District Hospital Casualty pawh mipui mamawhtute tan eng lai pawha biak pawh theih an nih thu meeting ah hian sawi lan a ni bawk.

Vawiin meeting ah hian department hrang hrang te, Village Council te, tlawmngai pawl te, Assam Rifles leh BSF te an tel a. Department leh pawl hrang hrang aiawh te hian chhiatna lo thlena hmachhawn dan tura theihtawp chhuah an inhuam thu an sawi a ni.