172/2025-2026

Dated Kolasib the 15th April 2025: Vawiin khan Kolasib DC conference Hall ah NH 154-Bairabi leh a chhehvel thawmthat hna kal mek a compensation lak chungchanga lungawilohna Bairabi Land Owners Association ten an lantir chungchangah Pu Robert C Lalhmangaiha, Kolasib DC hovin Land Owners Association ten thutkhawmna an nei a, Kolasib DC hian an nawrhna te titawp turin ram neitu kalkhawmte a ngen a ni.

Thutkhawmna ahhian Kolasib DC chuan Landowners te manganna chu an hriatpui a, chuvang chuan theihtawp in a tul ang ang in hma lak mek a ni, a ti. He an lungawilohna bultanna 2006 kuma compensation dawng ve lo ten an dawn theih nan hian hmalakna thui tak kalpui tawh a ni tiin, spot verification pawh nikumah neih tawh niin, chuta an assessment report te pawh PWD Highway lamah thawn phei tawh a ni a, chumi hnuah state sawrkar atanga thudawn bawhzuiin reassessment pawh neih leh niin chu chu LR&S Department ah thawn a ni leh tawh bawk a. State sawrkarin a approval na PWD highway lamah thawn in PWD lam pawh in an estimate te Regional Officer, MoRTH, Guwahati ah thawnin an thu ngaihchan mek a ni, a ti. 

DC chuan hetiang hi thil kal dan a nih avangin Contractor te hnathawk lo a an siam chuan awmzia a nei dawn lova, chuvang chuan dawhthei taka RO Guwahati lam thutlukna te ngaichang a contractor ten hna an chhunzawm theih nana an nawrhna te titawp turin a ngen a ni.

National Highway 154 (42km to 58km) Bairabi huam chhung a kawng thawmthatna tur atana land acquisition hna hi 2006 khan kalpui a ni a. Hemi atana compensation dawng tur list DC kolasib in draft a siam te hi 2007 khan  pawmpui a ni a. Amaherawhchu ram neitu, he Award no 1 draft a tel ve lote hian lungawilohna sawrkar ah thlen in sawrkar pawh in a bawhzui nghal a. Hemi chungchanga thutkhawmna te neih a nih hnuin nikum khan joint verification leh assessment te neih a ni a. He assesment ahhian ram neitu 34 te lungawilohna chu thu tling a pawm niin, compensation an lak theihna atan a tul anga bawhzui nghal a ni a. State sawrkar leh Mizoram PWD Highway pawh in Ministry of Road transport-in a zawhna an neih ang ang te chhang  in an thutlukna leh estimate te Regional Officer, MoRTH ah an thawn tawh a ni. 

Vawiin thutkhawmna ahhian ram neitute pawh in an harsatna te thlen in, an lungawilohna lantir chhan pawh sawrkarin a hriatthiampui an beisei thu an sawi a. A hma thei ang bera an compensation dawn tur te an lak theih nan theihtawp a hma lak pui turin DC leh PWD lam atanga kalkhawmte chu an ngen a ni.

Thutkhawmna ahhian Pu Robert C Lalhmangaiha, Kolasib DC, Pu David H Lalthangliana, Kolasib SP, PWD Highway Sr EE, SDO Kolasib , DC office a officers thenkhatte leh Bairabi Land Owners Association hotute an tel a ni.