173/2025-2026

Aizawl, the 15th April 2025: Vawiin khan I&PR Mini Theatre-ah Mizoram sawrkar leh International Association of Art - India (IAA) tangkawp chuan World Art Day 2025 lawmna leh a puala National Art Exhibition te, Seminar te an buatsaih a, Chief Minister Pu Lalduhoma, IAA Mizoram Chief Patron chuan a hawng, patron pahnih Pu C. Lalsawivunga, Minister, Art & Culture leh Dr. Vanlalthlana, Minister, I&PR te chu khualzahawm an ni.

A hawnna thu sawiin Chief Minister chuan, Art hi culture nen an inzawm tlat a, hnam nihphung, nunphung leh zia zawng zawngte hi chu mite hnam Art-ah chuan a lo lang chhuak thin. Ziak leh chhiar mumal taka kan hriat hma pawhin lemziak hmangin mihringten kan chanchin kan lo ziak tawh a, Mizote ngei pawhin A Aw B kan neih hma daih khan a lem hmangin thil kan lo thin a, lungphunah kan hmu thin. Chungte chu kan hnam Art innghahna pawimawh a lo chang ta a ni. Art leh hnam ze inkungkaih thukzia hi an hriat avangin UNESCO chuan IAA chu official partner ah hmangin, Art hmangin khawvelah inunauna te, remna leh muanna te thlentirna hmanruaah leh mipuite zirtir nan a hmang ta a, world heritage site te a puang a, hmalakna engemawzat a nei a ni.

Art hian ngawi rengin thu min hrilh a, ramri a nei ve lo va, sakhua emaw hnam angin min thliar ve lo va. Tawng hrang hrang hmang mah ila, thua sawifiah belh ngai lovin chiang takin thu min chah thin.

Mizoramin ram dang leh hnam dangte hriat kan hlawhna lian ber pawh kan Art & Culture te hi an ni a, khualzin kan hip theihna hnar pawimawh zinga mi a ni bawk. Mi te hriat hlawh tur leh khualzin hip turin kan ram mawi tak leh kan hnam ze duhawm tak te, kan culture tinreng hi kan Visual Art hmanga kan pho chhuah thiam a ngai a. Chutianga kan ram leh hnam pho chhuak theitute chu kan artist te hi in ni.

Kan film siamtu leh chang thintute, kan lemziak thiam te, kan photographers leh kan zaithiam leh lam thiamten hma an sawn nasa a. Film leh photography phei chu eizawnna tling industry a ni. Visual Art nodal department I&PR leh Art & Culture department thawhrimzia pawh kan hriatpui. Sawrkarin a theih ang angin hma han la thin mah ila a pawimawh ber chu nangni kan Artists te hi in ni. In kutchhuak tinrengah kan hnam ze thate tilang thei lo zep tam ula, kan ram leh hnam in chawimawi zel tihna a ni.

Rimawi lamah hian, hnam dang rimawi hman kawngah sang hle tawh mah ila kan hnam rimawi hmanrua, Phenglawng, Tumphit, Rawchhem, Bengbung, Mizo tingtang hrui khat nei leh a dangte hi kan kalsan ta deuh niin ka hria a. Kan rimawite i hmang uar thar ang u, tiin kal khawmte hi a chah a ni.

Pu C. Lalsawivunga, Minister, A&C, pawhin thu a sawi a, UNESCO leh IAA India te chungah lawmthu a sawi a. Mizoram chu art leh culture lama state hausa tak kan ni a, Art hian kan nun a kaihruai nasain, kan chhawr tangkai hle a. Kan hlut tial tial dawn a ni. Vawiina kan hun hman hian kan artist te kal zelna turah hlawkna tam tak a thlen ngei ka beisei, a ti.

Dr. Vanlalthlana, Minister, I&PR pawhin thusawiin, amah ngei pawh Art lama a lo inhman ve tawh thin thu sawiin, a lemziak a hralhna atangin High School a kal laiin sum a lo thawk chhuak tan tawh a, a hnuah Cartoon ziakin nitin chanchinbuah a tichhuak leh a, chung te chuan politics thlengin a ngaihtuahtir thin. Art chuan kan hmuh theih loh thil pawh min hmuhtir thei a, kan lungphun hluia lemziakte hmangin kan pi leh pute thuchah kan hre thei a, kan puanah te hian kan pi leh pute themthiamna a inbilh a ni, a ti a. Mizoten kan art, culture leh kan tradition te hi ngaihlu ila, a neituten kan hlut chuan hnam dangten min rawn hlutsak ngei ngeudawn a ni, a ti bawk.

Pu Manaj Saha, President, IAA India pawhin thusawiin, Chief Minister in World Art Day a hmanpui avangin lawmthu a sawi a. International Association of Art lo din dan leh UNESCO official partner a nih chhoh dan te, World Art Day hman a nih tan dan leh a thiltumte bakah Mizorama an hmalakna tlangpuite a tarlang. Pu Biblad Roy, Goodwill Ambassador, IAA India chuan keynote address a sawi bawk.

Pi Lubna Hassan, National Convener, IAA India hnen atanga thuchah chu video hmangin kal khawmten an thlirho bawk.

Inkhawm hi Pi Zodingpuii, IAS, Secretary, Art & Culture leh Working Secretary, IAA Moramin a kaihruai a, kal khawmte lawmna thu a sawi a. IAA India hruaitute leh IAA Mizoram hruaitute bakah Mizoram sawrkar officials te leh sawm bik te an tel a ni.

UNESCO World Art Day hi lemziak thiam hmingthang Leonardo Da Vinci piancham April ni 15-ah IAA chuan a lawm thin a. Kum 2019 atang khan UNESCO chuan a pawmpui a, UNESCO World Art Day tih a lo ni ta a ni.

Chawhma lamah a lawmna inkhawm hman a nih hnu hian Chief Minister hian I&PR Auditorium-a National Art Exhibition leh he buildinga awm Art Gallery te chu a tlawh leh a ni.