174/2025-2026

Aizawl, the 15th of April, 2025: Vawiin chawhma khan Pu Lalnghinglova Hmar, Minister of State, LESDE Department chuan MINECO-a a office-ah India leh Japan sawrkar thawhdunna hnuaia Japan a Caregiver hna thawk tura kal turte a thlahliam.

India leh Japan sawrkar in Specified Skilled Worker (SSW) programme kalpui turin Memorandums of Cooperation (MoC) an lo ziak tawh a. Hemi hnuaiah hian Kobe International University, Japan leh Mission Foundation Movement te chuan Japanese Language course kalpuiin, he program ah hian Japanese Language N4 thleng a zir theih a. Zir chhuak te chu Certificate of Eligibility, Ministry of Justice, Japan Government in a pek hnuah working visa pek niin vawiin khan Japan an pan. Hnathawk tura kalte hi Auxiliary Nurse Midwife course zirchhuak pahnih leh Phamacist 1 te an ni.

LESDE Minister chuan, "Japan in an ramah caregiver hna thawk tur an mamawh a, chumi tur chuan India ram an rawn hawi. An rama thawk turin hmel leh pianhmangah pawh anmahni hnaih deuh zawk tan beisei a sang zawk a, hemi atan hian hma kan la zel dawn. Mizoram nena thawkho turin an inhawng tih an sawi bawk a ni." a ti a.

“India hmarchhak a kan unau state dangte zingah hemi kawng hi hman tangkai tum an awm a, keini pawhin remchang hi kan lak a, kan thawn chhuah loh chuan thenawm state ten an thawn chhuak zel dawn a ni." tiin thahnemngaih a tul thu a sawi bawk.

Tun tum hi Mission Foundation Movement leh Japan sawrkar thawhdunna hnuaia Japan a kal tur batch hnihna an ni a. Anni hma hian Caregiver hna Nursing course pass chhuak mi 24 chu Japan-ah hnathawk a tirh an ni tawh.

Minister chuan kal chhuak turte chu thlahin, "Harsatna tawk tura inngai ula, thenkhat tlawmin lo haw leh awm mahse nangni chu a hlawhtling zingah in lo tel ngei dawn nia. A awlsam dawn lova, in kalna turte hi thil ti tak tak, thil ti thlap thlap an ni. Dan ang thlapa kal tur in ni a, in tluan ngei ka beisei a, tin, mahni pawh in inpeih ve a ngai dawn a ni." a ti a.

"Mission Foundation an fakawm a, miin tih nachang an hriat loh mai ni lo, tam takah chuan an tih peih lohte thlengin an ti a, an haichhuak nasa a. Hetiang ang hi Mizoramah hian awm belh thei ila, chu chuan Mizo thalai tan hna leh eizawnna kawng a hawng dawn a ni." tiin a sawi bawk.

Vawiin inthlahliamna hunah hian Pu John Tanpuia, Director, LESDE chuan kal chhuak turte fuihna thu a sawi a, Pu Lalramchuanzela, Executive Director, MFM-in report a pe bawk.