3523/2022-2023

Aizawl, 8th February, 2023 : Aizawl khawpuia Assam Rifles ram luah chhunga mimal ram neite LSC cancel tura Guwahati High Court-a Public Interest Litigation (PIL) an thehluh chungchangah Central YMA hruaituten vawiin khan Revenue Minister Pu Lalruatkima chu a pisa-ah an kawm.

Central YMA hruaitute chuan Assam Rifles ram luah chhunga dan kalha LSC pekte cancel tura kum 2019 kumtir lama Cabinet Meeting-in hma lak a lo remti tawh chu lawmawm an tih thu an sawi a. Assam Rifles ten an chhuahsan tur ram hi mimal hnena pek leh sahthlak chu Central YMA chuan rem a ti ngai dawn lo tih sawiin, he ram hi Mizo mipuite tana thil tha leh rotling siam nan a tawp thlengin beih an tum tih an sawi a. Joint NGO Coordination Committee pawhin hun kal tawhah khan Assam Rifles ram luaha mimal ram neite chu surrender turin an lo ngen tawh thu sawiin helai hmuna LSC neite chu an LSC kawl reng lova sawrkara pe let turin an ngen tawh thute, an ngenna a hlawhtling lo nia an hriat vangin High Court-a PIL kum 2020 khan thehlut an nih thu leh rei loteah court hearing neih a nih an beisei tawh thu Minister hnenah hian an sawi a, ram neituten an neih dan hi a felfai lo hle nia an hriat thu sawiin, mimal ram neite cancel sak tura sawrkarin hma a lak tawhnaah lawmawm an tih thu an sawi a, tun aia sawt lehzuala hmalak dan a awm theih beiseia Minister hi hmu an nih thu an sawi a ni.

Revenue Minister Pu Lalruatkima chuan CYMA hruaitute chu tha taka lo dawngsawngin hun rei tak atang tawh Chief Secretary lo awm tawhte kaihhruaina hnuaia Revenue Department leh Home Department in hma an lo lak tawh dan leh an bawhzui dante chipchiar takin a lo hrilhfiah a, mimal leh pawl anga kan duhdan leh ngaihdante dah bova, ram leh hnam tan a ni tih hriaa, ram leh hnam tana tha tur ber thlir chunga rilru zau tak helai hmuna ram neitute leh CYMA te bakah sawrkar pawhin kan put theih a pawimawh hle a ni, a ti a. Mi zawng zawng kan tan tlan a pawimawh a, sawrkar pawhin hmathlir thui tak neiin helai hmun hi thangtharte leh zoram tana rotling ni tura tuaihnum a duh a ni a ti a. Hemi hre reng hian Land Revenue & Settlement Department pawhin session kallai mekah “The Mizoram (Restriction on use of Transferred lands) (Amendment) Bill, 2023” pawh Assembly House a ngaihtuah turin a pu lut a ni a ti.

Vawiin thukhawmte hi zau tak leh inhawng taka inkawmin hmalak dan turte an sawiho a ni.

Minister hi Revenue Secretaryn Pu R. Zarzosanga, Revenue Director Pu K. Laldingliana leh Revenue Department official dangten an tawiawm a ni.