3522/2022-2023

Champhai, the 8th February, 2023: Vawiin chawhnu dar 2:30 khan District AIDS Prevention and Control Committee (DAPCC), Champhai District chu an Chairman Pu James Lalrinchhana, District Bawrhsap hovin Valentine's Day puala thisen pek runpui leh inzirtirna neih dan chungchang relin an thukhawm.

Thukhawm chuan February ni 14, 2023 chawhma dar 10:00 hian OPD Complex, District Hospital Champhaiah Valentine's Day puala inzirtirna leh thisen pek runpui huaihawt nise a ti a. Program hman dan turte duan nghal niin, Valentine's Day puala thisen pek runpui buatsaih rual hian thalaite hnenah thisen pe tura nun hrisel neih pawimawhnate, HIV/AIDS awareness campaign, ruihhloin nun a nghawng dan leh inven dante inzirtirna buatsaih nise an ti bawk.

District AIDS Prevention and Control Committee (DAPCC), Champhai District leh Association for Voluntary Blood Donation (AVBD) Champhai District chuan District mipuite chu he hun hi ngaipawimawha tel theuh tur leh, Valentine's Day puala inzirtirna tha tak takte ngaithlaa thisen pe theuh turin a sawm a ni.