No.3748/2021-2022
Aizawl, 21st January, 2021 : Aizawl khawpui chhunga kawngpui tawt tihziaawmna tur project “Aizawl Sustainable Urban Transport Project (ASUTP)” hnuaia hmalakna hmasa, Asian Develoment Bank sum US $ 4.5 million senna tura thawktu tur Mott MacDonald Cunsultancy Firm Pvt.Ltd., aiawhte chuan vawiin chawhma khan Chief Minister Pu Zoramthanga chu a pisa ah an kawm a, UD&PA Secretary Pu K. Lalthawmmawia leh UD&PA Director Pu H. Lianzela te pawh he inkawmna ah hian an tel a ni.

October ni 26, 2021 khan Department of Economic Affairs, Ministry of Finance, Government of India leh Asian Development Bank (ADB) te chuan ADB loan US $ 4.5 million hu Project Readiness Financing (PRF) Loan agreement an sign a, he loan hi Aizawl Sustainable Urban Transport Project (ASUTP) tana ruahman niin, Aizawl khawpui chhunga kawngpui tawt lutuk vanga lirthei chet vel harsatna sut kianna tur project a ni. He loan hi Aizawl khawpuia kawngpui tawt chhawk zangkhaina tura ruahmanna hrang hrang siamna atan hman tur a ni a, a thawktu tur atan India ram mai ni lo, khawvel huap pawha Consultancy firm hmingtha Mott MacDonald Pvt. Ltd. chu thlan a ni.

Loan Agreement angin Mott MacDonald Pvt. Ltd. hian January, 2022 atanga chhiara kum 3 (thla 36) chhung, December, 2024 thleng hun an nei a, hemi chhung hian zirchhianna hrang hrang an kalpui bakah Comprehensive Mobility Plan (CMP) for Aizawl Urban Area leh Detailed Project Reports (DPR) an peihfel tur a ni. Sawrkar laipui chuan loan US $ 4.5 million atanga 90% chu Mizoram sawrkar hnenah grant angin a pe dawn a, a bak 10% hi loan angin a pe chhawng dawn bawk a ni. An DPR siam hi Mizoram sawrkar kaltlangin sawrkar laipuiin a lo endik leh ang a, a tih hlawhtlinna tur sum a ngaihtuah sak leh dawn a ni.

Chief Minister Pu Zoramthanga chuan Aizawl khawpui chhunga kawngpui tawt tawh lutuk avanga lirthei chet vel harsatna leh traffic jam nasa lutuk tihreh chu sawrkarin a ngaih pawimawh berte zinga mi a nih thu Mott MacDonald Pvt. Ltd. aiawhte hi a lo hrilh a, Sawrkar anga hma an lo lak tawh thinnate leh ruahmanna an lo siam te a hrilhfiah bawk a, Aizawl khawpui leh a chhehvelte uluk leh chipchiar taka zirchiang a, mipuite tana harsatna awm lo tur thei ang bera ruahmanna tha tak siam chhuak ngei turin duhsakna a hlan a ni.