No.6694/2020-2021 

Aizawl, the 27th November 2020; Vawiin chawhnu khan Conference Room, Commerce & industries(C&I) Department, Khatla-ah Core Committee on Inspection of Market Price(CCOIMP) chu Pu J.Hmingthanmawia, Director, C&I leh Chairman, CCOIMP ni bawk kaihruaina hnuaiah an thu khawm a. He hunah hian mipui ten Bazarah Thlai, Thei leh Sa te man man zawka an lei theihna tura duan “The Mizoram Markets(Regulation & Facilitation) Ordinance,2020” chungchang bakah tunlaia thlai thenkhat leh Sa man to fal deuh te zawrhna rate tihhniam dan tur te sawiho a ni.

CCOIMP meetingah hian Ordinance hman theih a nih hunah Pawnlam atanga lakluh thlai thenkhat te leh Mizoram chhunga thlai thar lakkhawm hna thawk turin Mizoram State Cooperative Marketing and Consumers’ Federation Ltd(MIZOFED) leh Mizoram State Agriculture, Horticulture & Cooperative Federation(MAHFED) Ltd.. te chu mawhphurhna la tura rawt a ni a. Anni hian hlep sang tak um lovin Thlai thar tute leh Bazara hralhchhuaktute inkarah hna an thawk dawn a. Hei hian tuna Kharchhawngtute avanga man to taka thlai leh thei te zawrhchhuah te hi a tih tawp beisei a ni.

Meeting-ah tuna Aizawl Market hrang hranga thlai, sa leh thei  hralhna man zat te Pu H.D. Lalrintluanga, Addl Director leh Member Secretary, CCOIMP hnen atangin ngaihthlak a ni a. Thlai leh Thei thenkhat man bakah  Sa chi thenkhat man te chu siam that ngaiin hriat a ni a. Hemi chungchang hi chawhmehzuartute nen Thawhlehni(01.12.2020) hian sawiho leh tum a ni.

Core Committee on Inspection of Market Price(CCOIMP) ah hian C&I bakah Horticulture, FCS&CA, I&PR, Agriculture Department(Crop Husbandry), Agriculture Department(R&E), AH&Vety, Aizawl DC Office, Mizoram Consumer Union, MIZOFED, MAHFED, Central YMA, Joint City Local Council Association, Legal Metrology leh Fisheries Department aiawh te chu member an ni mek a ni.