466/2025-2026

Aizawl, 6^th May, 2025 : Land Revenue & Settlement Minister Pu B. Lalchhanzova chuan vawiin khan Mualpui Helipad ah sawrkar laipui pilot project "National Geospatial Knowledge-based Land Survey of Urban Habitations" (NAKSHA) hnuaia Aizawl chhim lama Municipal ward pakua (Ward XI – XIX) veng 43 huam drone  survey na tur a flag-off.

Drone flag-off inkhawm Mualpui Helipad-a neih ah Minister Pu chhanzova chuan NAKSHA chu sawrkar laipuiin pilot project anga  kalpui mek a nih thu leh hei hi a hlawhtlin chuan inhmun, lo/ram record vawn dan a tihchangtlun bakah nasa taka hmasawnna a thlen dawn tih sawiin, property record leh khawpui planning ah data tangkai tak an neih theih a beisei thu a sawi a ni. He project hnuaia data hmang hian ram buai leh enho ngaite pawh dawhkanah chiang taka enho a theih tawh tur thu sawiin, Pu Chhanzova chuan hei hi kan ramin a mamawh tak a nih angin LR&S Department pawhin nasa taka an tangkaipui tur thu a sawi a ni. Heng data te hi Revenue department chuan a hmang tangkai duh department te hnenah an hman chhawn tir theih tur thu a sawi bawk.

NAKSHA programme kaltlang hian India ram puma khawpui 153 thlan chhuah bikah Land Record tha zawk siam  tum a ni a. Mizoram ah pawh February ni 18, 2025 khan India ram pumpui rualin  Land Revenue & Settlement Minister hian he programme khuh hawnna hi a nei a. Mizoram pilot atan hian Aizawl Municipal Council hnuaia chhim lam Ward 11-19 (veng 43) thlan an ni a, bul tan nan Ground Control Points te siamin Helicopter in LiDAR leh Photogrammetry survey neih a ni tawh a. Tunah hian Drone hmangin thla lak a ni leh ang a; chumi a Map an rawn siamchhuah (generate) hmangin leilunga endikna Ground truthing kalpui leh a ni dawn a. Ram neitu bakah Local Council leh khawtlang hruaitute participation a pawimawh dawn em em a ni. Hetah hian LR&S department bakah UD&PA leh AMC te nen thawh hona tha tak neih a ngai dawn a  data pawh intawm vek tur a ni ang.

He hunah hian LR&S Director Pu R. Lalthazuala pawhin thu sawiin, Garuda UAV Pvt. Ltd. ten drone changkang ber ber hmanga Aizawl khawpui an survey tur chu lawmawm a tih thu a sawi a, tehfung dik tak an hman theih dawn avangin data fiah felfai tak a awm tawh dawn a, ramri buai chungchanga harsatna an tawh thin te pawh chinfel a awlsam phah sawt beisei a nih thu a sawi a ni.